AASU-in Political party te hmachhawp tichiang turin ngen

All Assam Students’ Union (AASU) te chuan state election neih hma ngeiin political party hrang hrangte chu road map tichiang turin an ngen. Hei hian state mipuite rilru sukthlek nasa takin a hril thei dawn niin an sawi.

AASU chief adviser Samujjal Bhattacharya chuan, political party te chuan ziak maiin an la dah nia sawiin, inthlan neih hma ngeia an hmachhawp hrang hrangte mipui hriata puangchhuak thuai turin an ngen tih a sawi.

Assamah hian ram-dang atanga dan lo-a lut engmaw zat an awm a, politician ṭhenkhat chuan heng mite vote duh hian an chungah ṭhat an chhuah niin zirlai pawl chuan a sawi. Zirlai te chuan an state chhungah hnam hrang hrang an awm tih sawiin, heng zingah hian ramdang mi tam tak an inphum ru a, heng mite hian vote an nei em tih sorkar an zawt.

Assam-ah hian tribal tam tak an awm a, tunah hian hnam hrang hrang paruk te chuan scheduled tribe status an beisei ve mek bawk.

Party hrang hrangte leilung hausakna lak chhuah kawnga an ruahmannna te, Numali-garh Refinery leh gas chungchanga an hma-chhawp te mipui hriat-tir turin an ngen. Bhatta-charya chuan eng party mahin argiculture leh thingpui huan siamtute tan hmalakna tur an la puang chhuak lo niin a sawi.

Kum tin tuilianin Assam state chhunga har-satna a thlen ṭhin suatkianna tur leh a ven dan tur mipui hma-ah an la puang lo niin Bhattacharya sawi bawk. Party tin te chu ṭhalai hna nei lo te tan eng ruahmanna nge an siam tih te, zirna kaihnawih-ah engtia hmalak nge an tum tih mipuite hriattir thuai se an duh tih a sawi. Hei bakah hian Arunachal Pradesh tuikhuah chuan Assam-ah engtiang chiahin nge nghawng a neih, mipuite tan a him tawk em tih te chu mipuite hriat duh niin Bhattacharya chuan a sawi bawk.

Assam assembly inthlan lo awm turah hian party hrang hrang bakah pawl hrang hrang te chuan thawm an nei ring sawt hle. Party ṭhenkhat chuan an candidate tur hming an puang tawh a, mipui ngaihven a hlawh hle. Candidate puan tawh zingah hian politician hlun leh mi challang tak tak an awm nuk avangin kum dang zawng aiin mipui te pawhin an ngaihven zual.

Congress party chuan Assam-ah sorkarna an chang mek a, sorkar laipui lamah BJP kaihhruai NDA in sorkarna an chan avangin party ṭhenkhatin hei hi remchangah lain sorkar lai chu paih thlak an tum hle. BJP leh a thu-rualpui te chuan sor-karna siam tumin theihtawp an chhuah a, Congress elpui ber tur an ni ang.

Inthlan boruak a len viau lai hian Election Comission of India chuan party hrang hrang te donation aṭanga an sum hmuhte report turin a lo hriatttir tawh. Report aṭanga a lan dan chuan Regional Party leh National Party te sum hmuh a inthlau hle a, hei hian inthlanah hian nghawng a nei a ngem tih chu zawhna awm thei a ni. Party tam tak sum leh pai hmachhuan an awm ṭhin a, hei hian boruak pawh a siam viau zel.

Political party-te chu hel pawl ṭhenkhat thurual puiah an inpuh tawn a, ṭhenawm ram Bangladesh aṭanga dan loa lo lut te humah an inpuh tawn bawk. Venhimna lam pawh uluk taka ken kawh a nih tur thu ECI lam chuan an puang tawh bawk. Tripura State Rifle mi 6000 vel chu West Bengal leh Assam-a assembly inthlan lo awm turah hian an duty dawn a, March ni 28 hian sipai te hian Assam an thleng dawn a ni. Tripura State Rifle te hi Bihar, Madhya Pradesh, Rajasthan, Chhattisgarh, Jharkhand, Nagaland leh Mizoram state election-ah te an lo duty tawh bawk.