Manipur rorellai MLA-te CM lakah hel

Manipur-a rorellai, Congress MLA zinga 25-te chu an Chief Minister Okram Ibobi Singh lakah lungawi loin an hel mek.

Kum 2012 assembly inthlanah khan Congress party hian assembly seat 60 aṭangin seat 42 a la a, record an siam hial a ni.

Mahse MLA ṭhenkhat chuan minister-a dah phutin CM hi an kar mek a, minister-a dah an nih loh chuan party chhuah-sanah an vau.

Congress President Sonia Gandhi chuan Manipur Congress party chhunga buaina thleng mek avang hian CM Obobi Singh chu Delhi-ah a ko a, harsatna an neihte chinfel dan kawng an sawi dun. Hetihlai hian MLA lungawi lo zinga eng emaw zat chu party hotute dawr turin Delhi-ah an awm mek bawk.

Thla eng emaw zat chu MLA lungawi lote hian CM chu a cabinet siksawi turin an lo phut tawh a, minister ṭanglaite chu thlak a, a la ṭang ve lote dah lut turin an phut.

MLA lungawi lote hian an thil phut hi tih-hlawhtlin a nih loh chuan BJP pawh an zawm mai thei nia sawi a ni bawk.

State BJP president Thounaojam Chaoba chuan, "Congress member kan party-a rawn luh tum eng emaw zat kan nei tawh a, list pawh hi kan tichhuak thuai ang" a ti.