Assam-ah Congress-in candidate a puang

Assam state-a sorkarna chang mek Congress party chuan Thawhlehni khan state assembly inthlan an hmachhawn turah party candidate turte hming a puang ve ta.

Candidate tur hming puan hmasak te hi mi 65 an ni a, an zingah hian chief minister ni lai mek Tarun Gogoi pawh a tel. Assam Chief Minister hi Titabor constituency-ah a ding dawn a, mipuite ngaihven ber pakhat a ni. Union minister hlui Pawan Singh Ghatowar chu Moran bial-ah a ding dawn a, Congress MLA ni lai mek Rajib Lochan Pegu chu BJP chief ministerial candidate Sarbananda Sonowal khing turin Majuli bialah a ding dawn bawk. Congress Party hruaitu hlun Santosh Mohan Dev-a nupui Bithika Dev chu hming puan tak zinga ngaihven hlawh ber pawl a ni bawk.

Assam state hian April 4-11 chhung hian assembly inthlan hi a nei dawn a, constituency 126 a awm.

Assam state election puan a nih hnu hian mipuiten zalen taka an aiawh roreltu an thlan theih nan venhimna lam uluk taka kenkawh a ni. State election neih tur thu puan a nih hnuah mi 1,479 te chu fimkhur thu hlaah man (non-bailable warrants) an ni tawh. An zinga 1,177 te hrem a ni tawh tih Additional Chief Election Officer Nitin Khare chuan a sawi. Inthlanna felfai leh ralmuang a awm theih nan hian polling station awm zawng zawng 1,913 te chu venhimna ṭha tak pek an ni. Surveillance team 36, flying squad 394 leh check-post 312 te peih fel a ni tawh bawk.