UNLFWSEA ten Assam inthlan tihbuai an tum

Security force te sawi danin Assam state inthlan lo awm tur chu hel pawl ṭhenkhat chuan tihbuai an tum niin thuchhuah an siam.

March 8 khan hmar-chhak biala hel pawl ṭhen khat inzawm khawm chu Dihing Reserve Forest, Tinsukia-ah an lut niin an sawi a, heng hel pawl te hian Assam state election chu tihbuai an tum niin Police lam chuan an sawi. Helpawl inzawm khawm te hi United Liberation Front of Assam (ULFA), People's Liberation Army (PLA), Kanglei Yawol Kanna Lup (KYKL) leh Nationalist Socialist Coun-cil of Nagaland (NSCN) mi leh sa te an ni thu leh, United National Liberation Front of Western South East Asia (UNLFWSEA) an din thu Assam Police te chuan an sawi.

United National Liberation Front of Western South East Asia (UNLFWSEA) te hi nikum kumtawp lama ding an ni a, thawm an neih takah hian Assam chu a dengchhuak hneh hle. Helpawlte hian dik lo takin tihluihna in mi sum an chhuh sak a, rova takin an che ṭhin a, heng an sum hmuh hmang han an pawl hi an enkawl a ni.

Sorkar laipui pawhin hmarchhak state te fimkhur turin a lo hriattir tawh a, heng mite thil tih titawp tur hian hma la turin a lo hriattir tawh. Heng helho hian National Democratic Front of Boroland (NDFB) an
ṭanpui thin niin an tarlang bawk. NDFB lakah hian sorkar laipui pawhin beihpui a thlak mek a, December 23, 2014 aṭang khan NDFB mi leh sa 70 chuang an that tawh a ni..

Hel pawlten inthlan tihbuai an tum tih thawm a rik takah hian, ven himna lam pawh khauh zual zawk a kalpui a ni dawn. Hmun ralmuang lo zuala polling station te chu ven uluk zual an ni ang. Venhimna kengkawh tur hian sipai engemaw zat tirh luh an ni tawh a, tirhluh belh an la ni dawn bawk.