Assam Agriculture Minister-in complain thehlut

Assam Agriculture Minister Rockybul Hussain chuan Nilaini khan 'Election Commission' team lakah complain a thehlut. EC team te hian Minister Hussain chu hriattir lawkna awm loin a motor an dap sak nia sawi a ni..

Hussain te chhungkua hi an chenna Panjabari pana an haw chu EC team te hian an lo nghak a, a motor chu an dapsak a ni. He mi chungchang-ah hian District Election Officer leh Election Commission Expenditure team te chuan engmah an sawi lo thung.

Rakibul Hussain chuan, "Election Commission ten ka motor an dap lai hian thlalatu an awm lo a, min vengtu te motor pawh an check a ni, anmahni chu an nihna pawh an insawifiah duh lo a ni" a ti. Hei hi politics thil vanga thleng a ni a, Congress mi leh sate rikrap an tumna nia a rin thu a sawi.

EC team hian an motora-ah 'Expenditure Observer On Election Duty Kamrup Metro-politan District' tih an tar a, team hotu chu Raghavendra Singh a nih thu Hussain chuan a sawi.

State Agriculture Minister Rakibul Hussain chuan, "He thil hi politics vanga inbeihna a ni, BJP hian Assam-ah hian sorkarna kan siam leh an hlau tak zet a, kawng hrang hrangin min bei mek a ni", a ti. He tiang thil hi mimal intih hmingchhiat tumna a ni a ti a, a lungawi thlak loh tak zet a ni, a ti bawk.

Congress party chu nasa tak a beih ni mah se, Assam-ah chuan an sorkar leh ngei dawn tih Hussian chuan a sawi. Assam-ah hian Tarun Gogoi-a kaihhruai Congress party chuan sorkarna a chang mek a, thla thar April 4-8 chhung hian inthlanpui an hmachhawn dawn a, sorkarna an siam leh thei angem tih chu fiahin a awm thuai dawn.