Meghalaya MLA-ten IAF station sawnchhuah an phut

Meghalaya MLA-te chuan Thawhlehni khan Shillong Peak aṭangin Indian Air Force station sawnchhuak turin an phut.

Hill State Democratic Party MLA Ardent Miller Basaiawmoit chuan Budget session neih meka Zero Hour hun hman-ah thu sawiin, Pathankot-a Air Force base beih a nih hnuin khuahkhirhna khauh zawk siam a ni a, hei hian state chhung pawh hman a ni tih an sawi. Shillong Peak bakah a bul vela Pomlakrai khua leh thingtlang khaw dangahte civil mite tana chetvel harsa khawpin khuahkhirhna kalpui a ni tih sawiin, hei hian mipuite tan harsatna a thlen a ni,an ti. Air Force base awmna huam chhungah hian mipui kal phal a ni lo a, gate leh kawngpui te chu uluk taka ven a ni.

MLA Basaiawmoit pawhin House-a member te hma-ah he mi chungchang hi sawiin, tunah hian Air Force lam hian hungna bang siam tumin hma an la mek a, chu chuan mipuite kaltlangna gate engemaw zat chu a ping dawn a, hei hian a bul hnaia chengte tan harsatna a thlen tih a sawi. Station chu mipuite harsatna sut kian a nih theih nan sawn chhuah nise a duh thu a sawi ve bawk.

Chief Minister Mukul Sangma chuan, Air Force gate chu mipuite tan luh chhuah chu a him tawk lo niin a sawi a, mipuite himna ngaihtuah a ngai a ni, a ti. CM chuan January 2-a Pathankot-a thil thleng ang kha a thlen nawn tawh lo an duh tih sawiin, Air Force Station sawn chu state sorkar thu neihna a nih loh thu leh, sorkar laipui thu neihna a nih thu a sawi.