EC team chetdan Gogoi-an dem

Assam Chief Minister Tarun Gogoi chuan Election Commission Expenditure Observer leh Income Tax Department ten Congress hruaitu hlun leh Agriculture Ministe Rakibul Hussain-a motor an dap sak chu a dem thu a sawi. Hei hi BJP sorkar thiltih a nih a rin thu leh Congress party tihmualpho tumna a nih thu a sawi.

Hemi chungchangah hian Assam Agriculture Minister Rakibul Hussain chuan Nilaini khan 'Election Commi-ssion' team lakah complain a thehlut tawh. EC team te hian Minister Hussain chu hriattir lawkna awm loin a motor an dap sak nia sawi a ni. Hei hi politics thil vanga thleng a ni a, Congress mi leh sate rikrap an tumna nia a rin thu sawiin, "BJP chuan Assam-ah Congress party-in sorkarna an siam leh an hlau tak zet a, kawng hrang hrangin beihna kan tawk mek a ni ", a ti.

Congress party chu nasa tak a beih ni mah se, Assam-ah chuan an sorkar leh ngei dawn tih Hussian chuan a sawi. Gogoi pawhin he thil thleng hi a dem tak zet tih a sawiin, " Mitinin dikna chanvo kan nei vek a, inrahbehsak hi danin a phallo a ni", a ti. Agriculture Minister an beih chungchangah hian Gogoi chuan in tih hmingchhiat tumna mai a nih thu a sawi. Hei hian state inthlan an hmachhawn turah a ṭha lo zawng nghawng a neih a hlauh thu a sawi bawk.

He thil theng hian sawi zui a hlawh viau a, Rakibul Hussain-a motor Elec-tion Commission Expenditure Observer team ten an dap lai hian an motor hmanah hian number plate a awm lo niin an sawi a, he hian thil dik lo an ti ngei a ni tih a tichiang hle niin Congress chuan a sawi.