Tripura Finance Minister-in Budget pharh

Tripura Budget session neih mekah Finance Minister Tapan Chakraborty chuan kar kalta Zirtawpni khan kum 2016-17 atana state budget a pharh.

Finance Minister Tapan Chakraborty chuan sorkar kum tharah hian chhiah lak tharna tur a siam lo tih a sawi.

Kum 2016-17 state budget atana sum ruahman chu cheng vaibelchhe 15,246.52 a ni. Kum 2015-16-a state budget kha cheng vaibelchhe 15,057.98 niin, budget punna hi 17 % a tling.

State sorkarin sum hmanral-na tura a ruahman zingah hian non-plan hnuaiah cheng vaibelchhe 8,631.59 niin, plan hnuaiah vaibelchhe 6,614.93 a ni. Sum indaih lohna hi cheng vaibelchhe 188.54 a ni. Plan hnuaia sum dah hi kum hmasa lam aiin 9.47% in tihpun a ni. Sorkar sum indaihlohna hi sorkarin chhiah a lak aṭanga rulh a ni ang, tiin Chakraborty chuan a sawi.

Tripura-ah hian khaw hrang hrang 8,132 a awm a, chung zinga 6,995 chu kawngpuiin a kal pawh theih te an ni. State khawpui Agartala-ah tunhnai khan rel a lut a, rel tlan chak chi chu tlan thuai tura beisei a ni bawk.

State sorkar chuan Agartala airport tih changtlun nan ram acre 75.726-a zau chu Airport Authority of India hnenah a hlan a ni. India rama a pathumna ni turin Mumbai leh Chennai hnung zuiin 'international internet gateway'-ah siam tura hma lak mek a ni a, 10 gigabit bandwith a chak internet chu Bangladesh aṭangin Bay of Bengal-a Cox’s Bazar an tih kaltlanga chawk luh tum a ni.

Chakraborty chuan power thar chhuah lamah state chuan hma a sawn thu sawiin, 400 kv transmission line chu peihfel a ni tawh tih a sawi. Heng power siamchhuah te hi Bangladesh chuan a chaw lut dawn a, power megawatt 100 chu Suryamaninagar aṭangin South Comilla-ah thawn thawnchhuah ṭhin a ni ang. Heng bakah hian state hmasawnna te chu minister chuan a tarlang a, chung zingah chuan Healthcare system te, tui thianghlim intur te leh Tribal Areas Autonomous District Council huam chhunga infrastructure lama hmasawnna te chu a langsar te an ni.

Tribal Areas Autonomous District Council-a tribal chengte chu state mipui hmun thuma ṭhena hmun khat an nih thu minister chuan a sawi bawk.Tripura sorkar hian an state chhunga khaw hrang hrang 1,118-ah Swachh Bharat Mission a kalpui dawn a, sorkar kum kal mekah hian hmun
ṭhenkhatah chuan kalpui a ni tawh thu a sawi. Ram chhunga tribal chenna khaw 491 leh non-tribal chenna hmun-a chhungkaw 92,047 hnenah inthiarna mumal tak siam sak an ni tawh tih minister chuan house a hrilh.

Assembly-ah hian Meghalaya chief minister leh Lok Sabha Speaker hlui ni bawk PA Sangma boral ta sunna hun minute hnih an hmang.