Hmarchhak state paliah hri kai hmuh belh

Hmarchhak state pali - Assam, Nagaland, Manipur leh Tripura-ah Covid-19 kai eng emaw zat hmuh chhuah belh leh an ni. 

Assam-ah nimin khan Covid-19 kai hmuh chhuah belh mi 49 an awm leh a, an state-a hri kai hmuh tawh hi mi 597 an tling tawh a ni. 

Thawhṭanni khan Assam-a ni khata hri kai hmuh chhuah tam ni ber niin, hri kai hmuh chhuah hi mi 147 an awm a ni. 

Assam health minister Himanta Biswa Sarma chuan Thawhlehnia hri kai hmuhte hi Golaghat, Lakhimpur, Morigao, Goalpar, Hojai, MMCH Guwahati, Karbi Anglong leh

Nagaon-a mite an nih thu a sawi. 

Nagaland-ah Shramik special train hmanga Chennai aṭanga haw mi pakhatin hri a kai tih hmuh belh leh a ni a,  hri kai hmuh chhuah hi mi pali an awm ta a ni. A hmain Chennai aṭanga haw vek mi pathumin hri hi an kai tih hmuh chhuah a lo ni tawh bawk. 

Nagaland health minister S Pangnyu Phome chuan mi pakhatin hri a kai tih hmuh belh a nih thu leh, rel-a a haw chhohnaa a bul hnaia lo awmte pawh chhui zui mek an nih thu a sawi. 

Manipur-ah Thawhṭanni zan khan hri kai mi pathum hmuh chhuah belh an ni bawk a, heng mite nen hian Manipur-a Covid-19 kai hmuh tawh hi mi 39 an tling tawh a ni. 

Additional director Dr K Sasheekumar Mangang chuan Thawhṭanni khan Virus Research and Diagnostic Laboratories (VRDL), Regional Institute of Medical Sciences (RIMS) Hospital, Imphal-ah sample 323 test niin, heng zinga pathum chu a positive tih hmuh chhuah a nih thu a sawi. Hri kai hmuh tharte hi Imphal West district-a mi vek an ni a, anni pawh hi state dang aṭanga haw an ni. 

Manipur-ah hian hri kai enkawl lai mi 35 awmin, hengte hi state dang aṭanga haw vek a ni. Hmun dang aṭanga hawte zinga hri kai hmuh belh zel an nih avangin state sorkar chuan dan khauh tak siamin,  metro city aṭanga hawte, quarantine centre-a ni 14 chhung inkhung hrang lote chu thubuai siamsakin, jail-ah tan tir zel an ni dawn tih a sawi. 

Tripura-ah pawh Thawhṭanni zan khan Covid-19 kai mi pali hmuh chhuah belh niin, hri kai hmuh tawh hi mi 198 an tling tawh. 

Thawhṭanni khan sample 990 test niin, an zinga pali chu a positive a ni. Hri kai hmuh chhuah tharte hi Rajdhani Express train hmanga Mumbai aṭanga hawte an ni. Hemi hma ni hian Delhi aṭanga haw, mi pathum chuan hri hi an kai tih hmuh­chhuah a lo ni tawh bawk.