Manipur-a Internet khapna ni 8 thleng pawtsei leh

Manipur-a mobile internet tihtawp chu Manipur sorkar chuan November 8 thleng pawhsei chhunzawm a nih thu an puang. Mobile internet khapna hi November 5 thleng pawhsei a lo ni tawh a, tunah hian social media vela boruak tichhe zawnga thil theh darh a awm lohna tur atan pawhsei chhunzawm an nih thu sorkar chuan an puang.

Kar hmasa Nilaini khan mipui pung khawmin 1st Manipur rifles camp an luh chilh a, mipui hnawh darh nan sipai lam hian silai an hmeh puah a ngaih phah a ni. Home Commissioner, T Ranjit Singh chuan thupek hi chhuahin, state chhunga buaina chhuak kaihhnawihah, dawt leh rilru tina thei thil theh darh a nih avanga thihna leh thil dang tihchhiat thleng thei thil tam tak laka inven nan internet ban hi chhunzawm a ngai a ni, tiin a sawi. Hetih lai hian tualchhung buainain a nghawng ve loh district-ahte chuan trial anga a tahtawl zela mobile tower te hawn chhunzawm an tum thu an tarlang bawk. Sorkar thuchhuah chuan hmun dangah pawh boruak ṭha a awm zel a nih chuan a tahtawl zela mobile internet hawn a ni ve zel bawk ang tiin a tarlang.

Manipur-a tualchhung buaina hian district 10 a nghawng a, May 4 aṭang khan broadband service chu tihtawp niin, thla hnih chhung tihtawp a nih hnuah July thla khan khuahkhirh chin neiin pek chhuah leh a ni tawh thung. Boruak ralmuang chho viauin lang mah se, Thawhlehnia Moreh khuaa SDPO kah hlum a nih avang khan Manipur boruak chu inralrin reng ngai niin sorkar thuchhuah chuan a sawi a ni.