AP : Palin constituency-a khaw tawp berah motor kawngpui a lut

Arunachal Pradesh-a Palin assembly constituency-a khaw tawp ber an tih, Sango Boa khuaah chuan motor kawngpui a lut tawh a, he kawngpui hi siam mek niin, tunah hian Sango Bao khua a lut thleng tawh. Thawhṭanni khan kawngpui siam mek hi Department of Power advisor leh MLA ni lai, Balo Raja chuan a hmunah a tlawh a ni.

Balo Raja chuan an state-a hmasawnna hna thawh kawnga chief minister Pema Khandu thlawpna an dawng ṭha chu lawmawm a tih thu sawiin, Nyomi aṭanga Sango pawhtu motor kawngpui neih chu a khaw mite beisei leh nghahhlelh em em ṭhin a nih thu a sawi. Kawngpui thar hian helai khuaa chengte tan hmasawnna bakah, awlsamna tam tak a thlen tawh dawn a ni,a ti.

Sango Bao hi Arunachal Pradesh ramhnuaia awm a ni a, a khaw awmnain a zir loh avangin motor kawngpuia tlawhpawh theih lohin rei tak a awm a ni. Kra Daadi district chhunga awm a ni a, he district hi February 7, 2015 khan Kurung Kumey district aṭanga siam a ni. Balo Raja chuan,"He motor kawngpui hian khaw kalpawh theihna a siam mai ni loin, Arunachal mipuite tana hma hun eng tak siamna kawng a ni. Helai khua leh a chhehvela mipuite hian damdawi in leh zirna in bakah, nunphung ṭha zawk neih theih nan kawngpui neih hi an mamawhna a rei tawh em em a, tunah chuan an duhthusamte a takin a thleng thei tawh dawn a ni," tiin a sawi.