In sak dan avanga buaina chhuakah mi pakhat thi

Tripura, Agartala city-a slum area, New Capital complex-a Goalabasti area-ah in sak dan avanga buaina chhuakin mi pakhat a thi a, mi panga man an ni bawk. Mi panga man zingah hian BSF trooper pakhat a tel a ni.

New Capital Complex SDPO, Paramita Pandey chuan,"He buaina kaihhnawihah hian mi panga kan man tawh a, NCC police station-ah thubuai theh luh tawh niin kan chhui zui mek a ni," a ti. OC Sushanta Deb chuan,"Buaina hi chhungkaw pahnih inkara chhuak niin, chhungkaw pakhat in sak dan chungchangah hian an buai zui a ni. Buaina hi BSF trooper awmna chhungkaw lamin chhungkaw pakhat zawkte hi an beih thut avanga chhuak chhunzawm niin kan hria," tiin a sawi.

Buaina chhuak avang hian kum 65 mi, Nagina Prasad Rai chuan hliam na tak tuarin GBP damdawi in panpui nghal ni mah se, a hliam tuar lo hian a boral ta a ni. Prasad Rai thihna avang hian buaina thar lam chhuak chhunzawm lehin, helai vela cheng mipuite chuan NCC police station kawtah BSF trooper, Sachindra Rai laka action lak phutin an pung khawm a, police-te chuan Sachindra Rai hi hemi zan vek hian man nghalin a lakah hian thubuai ziah a ni bawk.