Manipur : Pung khawmin sipai chhungte ru bo

Manipur Kangpokpi district-a Chingkhong khuaah Thawhlehni khan security checkpoint-a motor pakhat lut tur chu mipui pung khawmin lo dangin, a chhunga chuang sipai pakhat chhungte chu pawt chhuakin, hemi hnu hian an chin hriat zui a ni tawh rih lo. Thil thlenna hmun hi Kangpoki khaw bul a ni a, helai hi Kuki-Zo hnamte tamna hmun leh Meitei tamna, Imphal West inrinaa awm a ni.

Kuki-Zo pawl pakhat, Indigenous Tribal leaders Forum (ILTF) chuan L.Phaijang khaw pana kal civil mi pangate chu silai keng mi tute'n emaw lo dangin an zingah hian kum 65 mi, Manglun Haokip chu kut an thlak avanga hliam a tawrh thu an sawi. Hliam a tawrh hnuah nikhaw hre loin a awm a, CRPF mi leh sate chuan Leimakhong-ah kalpuiin, a hliam enkawl turin state pawn lamah phurh chhuah nghal a ni. Mi pali bote hi hmeichhe pahnih; Nengkim leh Neilam bakah mipa pahnih; John Thangjalam Haokip leh Jamkhothang te an nih thu an tarlang. Heng mite hi Kuki-Zo tribal hnam zinga sipai pakhat, Manipur-a post ni lo chhungte nia hriat an ni.

Manipur police-te chuan mi bote hi an zawn nghal thu an puang a, an vai hian Kuki niin, Churachandpur aṭanga Leimakhong pana kalte an ni. Kalkawngah hian mipui thinrim pung khawmin lo dangin heng mite hi kut an thlak a, helai hnaia security force duty-te nen intibuai chhunzawmin sipaite hi pung khawm zinga silai neite nen an inkap zui bawk a ni, an ti. Sipaite leh misualte inkahna hmun hi K. Songlung hill range, Koutruk leh Tairenpokpi hmunahte a ni. An inkahnaah hian police pahnih leh civil mi pasarihin hliam an tuar a, an vai hian damdawi inah hruai niin sipaite hian buaina a reh hnuah helai hmun hi an dap chhunzawm a, bunker pakhat an tichhe bawk.

Pathianni khan helai hmunah hian Meitei tleirawl pahnih, Imphal West-a function hmang tura kal; Maibam Avinash (16) leh Ningthoujam Anthony (19) te haw lam chu ruk bo an lo ni tawh. Hemi kaihhnawihah hian police-te chuan Kangpokpi district aṭangin mi pathum an kawl mek thu leh, central leh state sorkar nena inkahhai puang mek Kuki Revolutionary Army (U) mi leh sa pahnih chu Naga tamna, Senapati district aṭangin an man.

Internet pe chhuak turin HC-in thu pe

Manipur sorkarin Manipur-a mobile internet khapna, November 8 thleng a pawhsei hnuah, Manipur High Court chuan sorkar chu buaina thlen lohna district headquarters hrang hrang chhungah mobile internet service pe chhuak tawh turin a hriattir.

Manipur High Court chief justice Siddarth Mridul leh justice Golmei Gaiphulshillu Kabui te chuan thupek hi tichhuakin, buiana thlen ve lohna hmunahte chuan a tahtawla internet khapna hlip turin an ti a, hei hi boruak ṭhat dan a zir zelin hmun dangah pawh pe chhuak chhunzawm zel tawh turin state sorkar hi an hriattir a ni. High Court chuan buainain a la nghawng mek district huam chhungah pawh, boruak a ziaawmna hmunah pawh internet hi pek chhuah tawh ni se an duh thu an tarlang a, state sorkar chu an official website-ah Manipur-a internet khap a nih chungchanga thuchhuahte dah chhuak vek turin a ti bawk. High Court chuan hemi chungchanga hmalakna awm dan chu November 9-ah ngaihtuah chhunzawm a nih tur thu an tarlang bawk a ni.