NE fashion week-ah designer 30 kutchhuak pho chhuak dawn

Jollang, Arunachal Pradesh-a November 19-21 chhunga neih tur, North East India Fashion Week (NEIFW) ṭum ruknaa an kutchhuak pho turin designer leh puan tahtu 30 thlan an nih tawh thu NEIFW CEO, Yana Ngoba Chakpu chuan a sawi.

NEIFW hi Jollang-a Koro Happa River Island-ah neih a ni dawn a, ni thum a awh ang. Arunachal Pradesh-a culture leh hnam nunphung chawi lara humhim duhtu NGO, One Arunachal te buatsaih niin, Fashion Week hi kalpui a nih aṭangin ṭum nga neih a ni tawh a ni. Yana Ngoba chuan thil siam thiam bikte kutchhuak aṭanga hmarchhak biala puan tahtu leh thiamthil neite dinhmun zir chian a, an tha tihchak chu an tum a nih thu sawiin, an kutchhuak nalh tak takte pho lan a nih tur thu a sawi a ni.

NEIFW 6th edition-ah hian Divyangjan leh non-Divyangjan thliar loin an zinga thiam thil neite zawng zawng tana inpho chhuahna hun siam a ni dawn a ni. Fashion Week neih chhung hian workshop buatsaih a nih dawn bakah round-table conference neih a ni dawn bawk a, model-te'n ramp show an nei bawk ang. Arunachal Pradesh chief minister, Pema Khandu chu chief guest tura beisei a ni a, Assam chief minister Himanta Biswa Sarma bakah mi pawimawh tak tak an tel bawk ang.