Assam cabinet-in cancer hospital 10 sakna tur pawm

Assam state cabinet chuan Assam Cancer Care Foundation (ACCF) tana budget dah, Rs. vbc 135 chu pawmin, hei hi state chhunga cancer hospital 10 sakna tur atana ruahman a ni.

Cancer hospital hrang hrangte sak hna hi thawh hniha kalpui tur a ni dawn a, thawh khatnaah hian Silchar, Guwahati leh Diphu-ahte sak phawt tur a ni ang tiin chief minister Himanta Biswa Sarma chuan a sawi. Thawh hnihnaah hian Dhubri, Goalpara, Golaghat, Nagaon leh Tinsukia-ah te cancer hospital hi sak chhunzawm leh tum a ni. Tourism minister, Jayanta Malla Baruah chuan heng project te hi thawh zawh a nih chuan hna thar siamna kawngah pawh a ṭangkai tur thu sawiin, hna 8,000 chuang siam belh theih an beisei thu a sawi a ni.

Assam cabinet meeting-ah hian cancer hsopital sakna tur bakah 'Free Drugs and Consumables for Government Hospitals' program atan Rs. vbc 133 pawm a ni bawk a, Dearness Alowance (DA) 4%-a tihpun te, PM-POSHAN program hnuaia mid-day meal-a kar tin artui pathum pek tel te chu an pawm bawk. SCERT hnuaia English Language Teaching Institute (ELTI) dah leh Mission Basundhara hnuaia district panga; Maorigaon, Bongaigaon, Goalpara, Dibrugarh leh Sonitpur huam chhunga ram leilung fa, ram nei lo mi 2,538 te tana ram pekna tur pawh an pawm zingah a tel.