Nagaland Assembly-in Municipal Bill pass

Nagaland Assembly chuan Ningani khan urban local bodies (ULBs)-a hmeichhiate tana 33% reservation dahna, Nagaland Municipal Bill, 2023 chu lungrual takin takin a pass.

Chief minister Neiphiu Rio chuan house-a bill sawi honaah hian civil society te leh Naga tribal Hohos te pawh an lo sawipui tawh thu a sawi a, bill-ah hian tax, ram leh building chungchang dah tel a nih loh thu a sawi. CM chuan Municipal emaw town council thlan chhuahte chuan anmahni huam chhung zel atan tax leh fee khawn vel chu an rel chawp thei ang, a ti. . Nagaland Municipal Bill, 2023-ah hian Municipal act pass tawh, khawpui huam chhung municipal office chairperson-a hmeichhe tana one third reservation pawh dah tel a ni lo a ni. Naga pawl hrang hrangte chuan khawpui huam chhunga municipal chairperson-a hmeichhe tana reservation siam hian an hnam dan a kalh thu an sawi tawh a ni.

Nagaland hian 2001 khan Nagaland Municipal Act, 2001 chu house-ah an lo hnawl tawh a, Naga tribal huhang nei tak Hohos te chuan Article 371(A) a kalh tiin an ṭang a ni. State sorkar pawhin hmeichhe tana 33% reservation siam chunga municipal inthlan hi neih a lo tum fo tawh a, mahse, pawl tam takin an dodal ṭhin avangin inthlan an nei thei ṭhin lo a ni. Nagaland-ah hian an ram zaa 95 chu mimal leh hnam bikte ta a ni a, sorkar hian kawngpui leh ramngaw te tiamin Nagaland ram pum aṭanga 5% vel chiah a nei a.