Tripura : Congress-in AICC hnenah hruaitu hlui hekna thawn

Tripura-a Congress unit chuan All India Congress Committee (AICC) hnenah an MLA leh state unit hruaitu hlui, Birajit Sinha chu party chhunga inṭhen hranna leh party kalh zawnga chetna thilah a inhnamhnawih nia sawiin, a laka action la turin hekna lehkha an thawn. Tuna state Congress president ni mek, Asish Kumar Saha nena inhnaih tak hruaitu pakhat chuan state pangaa inthlan neih a nih zawhah AICC chu action la vat tura a beisei thu a sawi.

Pradesh Congress Committee (PCC) president a nih tawh loh aṭangin Sinha hian thla eng emaw ti chhung chu Congress Bhavan a tlawh tawh ngai lo a, party programme-ah pawh a tel tawh ngai lo a ni. Sinha hian Tripura-a thingtlang khaw ṭhenkhatte tlawhin party chhunga a lam ṭangte a hmu ṭhin nia hriat a ni a, state National Students' Union of India (NSUI) president hlui, Samrat Roy leh Sushanta Chakraborty, state youth congress president hlui te chuan an ṭawiawm ṭhin niin an sawi. Sinha ṭhian hnai tak Samrat Roy pawh hi NSUI state president a nihna aṭangin ban a ni tawh bawk a ni. Sinha hian a awm zel dan tur chungchangah engmah a la sawi lo thung a, Roy erawh chuan zau zawka mipui tana hma an lak theihna tura Development Forum din an rilru thu a sawi. Congress aṭanga chhuah tum nia sawi Sinha leh a pawlte hian chhuah an tum loh thu an sawi.

Congress hian Tripura state assembly inthlan hnuhnung ber leh by-election neihah te khan CPI(M) thawhpuiin inthlan an chuh a, tualṭo party TIPRA chu an elpui ber an ni. Congress hian tun dinhmunah Tripura state assembly-ah hian MLA pathum an nei mek.