Manipur : Sipai chhungte ruk bo zinga mi nia rin ruang chhar

Manipur Kangpokpi district huamchhung checkpoint-a motor aṭanga Meitei-te'n an ruk bo, Kuki sipai chhungte pali zinga pahnih ni ngeia hriat ruang chu Imphal-a hmun hran ve veah hmuh a nih thu police-te chuan an sawi. Ruang an chharah hian silai kahna hnuhma awmin, tute nge an nih finfiah a nih hmaa post-mortem phawt an nih tur thu an sawi.

Police-te chuan Kuki mi pali ruk bote zawn hna chu an thawh reng thu sawiin, tuna ruang an chhar hi mipa leh hmeichhia an nih thu an sawi a, ruk bo zinga mi an ni ngei em tih erawh finfiahna an la neih loh thu an sawi thung. Police-te hian Imphal west district chhunga Tairenpokpi area-ah hmeichhe ruang, a lu a silai kahna hnuhma awm leh, mipa, kum 40 vel nia hriat ruang chu Imphal East district-a Takhok Mapal Makha area-ah an chhar a ni. Ruang an chharte hi Regional Institute of Medical Sciences, Imphal-ah post-mortem tura an thawn thu an sawi bawk.

Ruk bo zinga nu pakhat zawk fapa chuan a chhungte chu inneihna hmang tura Leimakhong pan an nih thu leh, ruk bo an nih chungchanga thubuai an theh luh hnuah police-te chu thu zawt fiah tura an la kal loh thu a sawi a ni.

Kuki mi ruk bo an nih chungchangah hian Kuki pawl pakhat, Kuki Inpi chuan thuchhuah siamin, "Kuki Inpi Manipur te chuan kan mi leh sa ruk bo an nih chungchanga Kuki-Zo hnamte'n kan phut ang aia thuneitute che muang lutuk avang hian kan lawm lo hle a ni," tiin, Meitei-te'n an ruk bote chu inneihna hmang tura kal mai an nih thu an sawi ve bawk.

Hetih lai hian Union Ministry of Home Affairs (MHA) official-te chuan Kuki-Zo pawl pakhat, Indigenous Tribal Leaders Forum (ILTF) mi leh sate nen chu Ningani khan Manipur-ah kawm a, August 8-a ILTF leh union home minister Amit Shah inkawmnate an thlir let a ni. August thlaa meeting an neihah hian tualchhung buaina chhuak avanga thite phumna chungchanga Kuki leh Meitei-ten inhriatthian lohan an neih chungchang an sawipui a ni.

Ningania MHA leh ILTF aiawhten meeting-ah hian ILTF lam chuan Moreh-a state police commando tir lo tura inremna an lo siam tawh bawhchhiat a nih chungchang an sawichhuak. Hei bakah hian hill area aṭanga state force-te lak chhuah vek an duh thu an sawi nawn leh bawk.