Manipur : Tribal zirlaite'n Churachandpur district-ah kawng zawh

Manipur-a BJP sorkar chu zirna ngaihthah leh, zirna a kalpui danah inthlauhna a awm nia puhin, Inrinni liam ta khan Kuki-Zo zirlai sang telin Churachandpur district-ah kawng an zawh.

Kawng zawh hi Joint Students' Body, Lama huaihawta neih niin, thupui atan 'Rally against educational negligence' tih an hmang.

Lamka Public ground aṭangin kawng hi an zawh ṭan a, Mini Secretariat complex, Tuibong-ah an tawp. Zirlai kal khawmte chuan Kuki-Zo zirlaite a thliar hran avanga Manipur sorkar laka an lungawi lohna thute an aupui a ni.

JSB chuan state sorkarin zirna a ngaihthah leh zirna kalpuina kawnga inthlauhna nasa tak a awm avangin, tualchhung buaina a chhuah hnuah tribal zirlai tam tak chu class kal chhunzawm thei loin an la awm a ni, a ti. Kuki-Zo zirlaite harsatna chinfelna tur hrang hrangte chu tun thlengin tihkhawtlai a la ni tih an sawi bawk.

Zo zirlaite tana rorelna dik kalpui a nih loh chungchangah, JSB hian district deputy commissioner kaltlangin union home minister Amit Shah hnenah memorandum an theh lut nghal bawk. An thil phut zingah hian hill district-a Central University din tur te, technical institute leh medical education din tur leh, tribal ministry hnuaia fund leh hamṭhatna dang awmte chu hill district-a organisation-te hnena a hun taka pe tura phutna te a tel.