Meghalaya-ah Rs. vbc 4 man ruihhlo hal ral

Meghalaya police-te chuan ruihhlo an man, Rs. vbc 4 man hu chu East Jaintia Hills-a Star cement factory-ah an hal ral thu an sawi. Ruihhlo hal ral zingah hian heroin Rs. vbc 3 man a tel a, cannabis Rs. nuai 80 man leh Yaba tablet, nuai 20 man a tel thu Director General of Police (DGP), Lajja Ram Bishnoi chuan a sawi.

Heng ruihhlote hi case 50 chuang aṭanga an man khawmte an ni. Court-in hal ral tura thupek a chhuah hnuah ruihhlote hi hal ral a ni ta a ni. Meghalaya police-te chuan nikum khan an state-ah ruihhlo tawlh ru ṭhin mi 500 aia tam an man thu leh, thubuai 135 ziah luh a nih thu an tarlang.

DGP chuan Meghalaya mipuite ruihhlo laka an fihlimna tur atan theihtawpa ruihhlo tihrem an tum thu sawiin,"Awareness programme 1,500 kan buatsaih tawh a, awareness chu police-te hmalakna pawimawh tak paruk zinga pakhat a ni. Kum liam ta khan ruihhlo test-na kan neih chhiat avangin thubuai tam tak a kal muan phah a, mahse, sorkarin sample test-na tur hmanrua, vaibelchhe tel man min pe tawh a, rei lote chhungin kan test zung zung thei tawh a ni," tiin a sawi.