Sikkim-in zirtirtu probation-a awmte dah nghet dawn

Sikkim chief minister Prem Singh Golay chuan National Education Day pualin nakkum National Education Day hmain zirtirtu probation-a awm mekte dah ngheh vek an nih tur thu a puang.

Sikkim-in dan an hman mekah chuan zirtirtu probation-a awmte hi kum riat hnuah chauh dah ngheh an ni ṭhin a, mahse, Golay chuan tun ṭum atan dan awm sa chu tihdanglam a nih tur thu a sawi a ni. An dan hman lai Sikkim Kantikari Morcha sorkar laia siam kha a la ni a, mahse, CM hian 2024 hma lama zirtritu lak zawng zawngte chu dah ngheh an nih tur thu leh, 2014-2015 chhunga lakte pawh dah ngheh an ni tawh tih hi a sawi.

National Education Day lawmna hi Sikkim Probationary and Regular Teachers Association (SPARTA) buatsaih a ni a, he hunah hian CM chuan probationary zirtirtu 148 te hnenah dah ngheh an nihna tur lehkha pein, heng zirtirtute hian NCTE kalphung an pha lo thung. CM Golay chuan,"Zirtirtu 148 te hi zirtir tur ni lo staff anga lak an ni anga, heng zinga primary zirtirtute chu junior academic administrative assistant bakah, graduate chinte chu academic administrative assistant leh post graduate zirtirtute chu senior academic administrtive assistant anga lak an ni ang," a ti. National Education Day lawmnaah hian Namchi district-a zirlai 7 te hnenah, UPSC leh SPSC coaching te kala zirna an chhunzawm theihna tur atan scholarship pek an ni bawk.