Manipur :Saikul MLA-in relief camp-ah ṭanpuina pe

Manipur-a Saikul Assembly constituency aṭanga thlan tlin, Manipur MLA naupang ber leh hmeichhe MLA thlan tlin hmasak ber, Kimneo Haokip Hangsing chuan Pathianni khan a bial chhunga Manipur tualchhung buaina avanga mahni in leh lo tlansante awmna, relief camp tlawhin, thlasik atana an mamawh tur thil chi hrang hrang leh thawmhnawte a pe.

Kimneo hian mi 500 awmna, Litan Sareikhong relief camp chu tlawhin, helai hmuna awmte tan hian blanket, mut bu leh naute mamawh thil chi hrang hrang a pe a, camp a tlawh lai hian nau piang a awm thu a sawi bawk. "Khaw vawt leh hrehawm tak aṭanga an him nan leh an lum ve theih nan, thlasika an mamawh zualpui turte ka pe a ni," tiin Kimneo hian a sawi a, thlasik boruak chu a nat ṭhin thu leh thlasik laia an mamawh tur pek chu ngaihpawimawh a ṭul thu sawi bawkin, relief camp-a khawsate harsatna chu a hriatthiampui thu a sawi.

MLA Kimneo chuan relief camp-a khawsate chu an chhelna leh an rilru paukhauhna avanga fakin, hun harsa tak karah pawh hlim hmel an pu thei chu lawmawm a tih thu a sawi. Relief camp dinhmun chu sorkarin a vil reng thu leh, mahni in leh lo tlansana relief camp-a khawsate ṭanpuina leh chhawmdawlna tur sorkarin a ngaihtuah reng thu a sawi bawk. Relief camp-a khawsa naupangte kawmin, zirnaa harsatna an tawh dante a sawipui a, Kangpokpi-a thuneitute kawm bawkin, relief camp-a khawsate tana hmalakna turte a sawipui bawk a ni.