Silsako aṭanga chhungkaw hnawhchhuahte'n Diwali of Sorrow hmang

Guwahati Metropolitan Development Authority (GMDA) in Silsako Beel aṭanga an hnawhchhuah, chhungkaw 200 te chu Guwahati-a Sachar Dharna ground-ah pung khawmin, Pathianni tlai khan Diwali lungngaihthlak (Diwali of sorrow) an hmang.

Pung khawmte hian bati chhiin, Silsako aṭanga hnawhchhuah an nih avanga chhungkaw harsatna tawkte tan compensation leh chhawmdawlna a rang lama ngaihtuahsak turin Assam sorkar chu an ngen a ni.

Silsako Beel-ah hian a ruka luta cheng anga puhin chhungkaw 1,000 zet chu Guwahati Metropolitan Development Authority (GMDA) te hian an lo hnawtchhuak tawh a, May 13, 2022 khan a hmasa ber atan hnawhchhuah hna hi ṭanin, kumin February leh March-ah leh September thlaah te khan chhungkaw tam tak a tahtawlin an hnawtchhuak bawk a ni. Silsako aṭanga hnawhchhuah chhungkaw 200-te'n Diwali lungchhiatthlak an hmannaah hian Assam Pradesh Congress Committee (APCC) president, Bhupen Kumar Borah leh a ṭhuihhruai ṭhenkhatte'n an telpui a ni. Bora chuan,"Assam mipui zawng zawngin aupui thei lo mah se in lam an ṭang a, dik lo taka rorelna hi hnehin a la awm ang. Keini pawhin in leh lo nei lote tana kan beihna hi kan chhunzawm zel ang a, in fate leh in thlahte tan enna thlentu kan ni ngei ang," tiin pung khawmte hi a hrilh.

Silsako Paror Ussed Pratirudhi Raij hruaitu, Gayatri Bori chuan,"He lai ramah hian kum 30 aia tam kan khawsa tawh a, chhuak tura hriattirna hi a hmain engmah kan dawng lo. Assam land law, 1989 leh 2019 chuan sorkar rama kum 15 chuang cheng tawhte chuan land document an dawng tur tih a ni. Mahse kan sorkar hian kum 40 chuang lo awm tawhte pawh land rights a pe duh lo a, hnawhchhuah vek an ni," tiin, ram pumin Diwali an lawm lai hian Diwali lungngaihthlak kan hmang thung a ni, a ti.