Assam inthlan turah Nomination paper 586 pawm tawh

Assam state chuan April 4 -11 chhungin assembly inthlan a hmachhawn dawn a, inthlana chuh tum candidate-te chuan nomination an file tawh.

Constituency 65-ah ding turin candidate 599 te chuan nomination an file tawh a, chung zinga 586 chu pawm a ni a, candidate 13 te nomination paper erawh endik an nih hnuah pawm an ni lo tih Additional Chief Electoral Officer Nitin Khade, Gaurav Bothra, Siddharth Singh leh Adil Khan-te chuan an sawi. Nomination paper thehluh belh an la awm reng a, vawiin hi inthlan thawh khatna atana chuh tum, candidate-te tanaq inhnuhdawh theih ni hnuhnung ber a ni. Inthlan thawh khatna hi April 4 hian neih a ni ang.

Nitin Khade chuan, Model Code of Conduct kalh zawnga che mi 1,445 man an ni tawh a, an zinga 1,208 chu hrem an ni tawh a tih a sawi. Ralthuam 24,151 chu mankhawm a ni tawh a, District Electoral Officer te leh SP te chu an mahni huam chhung theuha hma la tura hriattir an ni tawh bawk. Dan lova silai kawl 86 man an ni tawh a, silaimu 333 chuang man a ni tawh bawk. Heng silai leh a mu neitu te hi CrPC hnuaiah hrem a ni tawh tih Khade chuan a sawi bawk.

Singh chuan Election Commission of India (ECI) chuan Assam-ah Expenditure Observer 46 a dah tih sawiin, heng mite hian party tinte sum chet vel chu dan an thlithlai reng a ni, a ti. Flying squad team 396 chu state chhung hmun hrang hrangah siam an ni bawk a, heng team-ah hian magistrates, police leh videographer te an awm. Flying squad hian inthlan vuakveta dan kalhah thiltih, vote zawnna atan zu leh pawisa sem a awm leh awm lohte uluk takin an chhui reng a, an motor-ah GPS nen thuam vek a ni.

Pathianni tlai thleng khan Flying squad-te hian Model Code of Conduct kalha sum hman cheng vaibelchhe 2.95 an man tawh a, zu liter nuai 4.33 leh drugs kg 5.5 an man tawh a, mi 1,185 te4 lakh thubuai ziahluh a ni tawh bawk.

Monitor control room leh call centre 1950 din a ni a, anni hian chhun zan zawmin hna an thawk a ni. Heng bakah hian Air Intelligence Unit chu state chhunga airport parukah din a ni bawk.

Hmarchhak state zinga lian ber leh mihring tamna ber ni bawk Assam inthlan tur hi a boruak a lian hle a, sorkar laipui pawhin a ngaihven hle a ni. Tunah hian Congress chuan sorkarna an chang mek a, sorkar thar siam tumin BJP leh party dang te chuan hma an la ve reng bawk.

Hmun ṭhenkhatah chuan candidate te vauna chhak chhuak tawk an awm ve bawk a, hel pawl ṭhenkhat inzawm khawm chuan buaina siam an tum thu an sawi a, ven himna pawh khauh zawka kenkawh a ni dawn a ni. Election Commission of India (ECI) team chu Assam-ah hian an cham mek a, party hrang hrang aiawh, inthlan buaipuitute leh media mite an kawm dawn ni.