MHA-in UAPA hnuaiah Meitei pawl pariat khapna tichhuak

Union Ministry of Home Affairs (MHA) chuan Unlawful Activities Prevention Act (UAPA) hnuaiah Meitei firfiak pawl pariatte chu India aṭanga Manipur ṭhen hranna tur kawng hawia ralthuam nena beiah puhin, an pawl chu dan phal loha ding a nih thu sawiin, heng pawlte khapna thupek hi a tichhuak.

Heng pawl pariat, MHA-in a khap takte hi PLA tiha hriat, Peoples' Liberation Army te, PLA political wing; Revolutionary Peoples' Front (RPF) te, United National Liberation Front (UNLF) te, Manipur Peoples' Army (MPA) te, Peoples' Revolutionary Party of Kangleipak (PREPAK) leh an hnuaia firfiaka che pawl 'Red Wing' te, Kanglei Yaol Kanba Lup (KYKL) te, Coordination Committee (CorCom) leh Alliance for Socialist Unity Kangleipak (ASUK) te an ni. Sorkar thuchhuahah chuan heng pawl pariatte hi Meitei firfiak pawl tiha tarlan an ni.

Thuchhuaha tarlan a nih danin, heng pawlte hi India ram himna leh inpumkhatna tiderthawng thei zawnga chet la leh khawsaah puhin, an thil tum tipuitling tura ralthuam hmangah puh an ni. Manipur-a civil mi leh police bakah sipaite pawh that leh bei ṭhin niin a tarlang. Mipui sum rawka an mamawh leina atana hmang leh ram dang aṭanga ṭanpuina dawng a, invauna leh inrikrapna hmanga ram rorelnaa inrawlhah te puh bawkin, India aṭanga inṭhen hranna tur zawnga hmalakna an neih zingah ralthuam hman zirna leh sipai training angte an kalpui thu sorkar chuan a sawi. "Khap behna tur leh an thiltihte dodalna tura hmalakna kan neih vat loh chuan remchangah lain an thil tum tipuitling tur hian an beiṭan mai ang tih a hlauhawm a ni. Firfiaka chet, ralthuam hman te an hreh dawn si lo a, thu dik lo theh darhin ram dodalna rilru an tuh mai ang," tiin MHA chuan an tarlang.

MHA hian heng pawlte hi kum 10 chhung atan a 'ban' a ni. Sorkar official pakhat chuan Manipur-a hnam leh hnam inkara tualchhung buaina chhuakah heng pawlte inrawlhna hriat chhuah a nih thu a sawi bawk.