Garo zirlaite'n kawng chhia avangin nawrh huaihawt

South Garo Hill-a Karukol huam chhung kawngpui chhe lutuk avanga lungawi lohna lantirin, Garo Students' Union (GSU) te chuan kawng an zawh. Zirlai pung khawmte chuan kawng chhia siam tura thuneitute che muang lutuk chu an dem thu leh, a bikin National Highway 62 siam ṭhat loha rei tak a awm chu an ngaihmawh thu an sawi bawk.

GSU chuan,"NH-62 dinhmun hi a chhe em em a, kum 10 dawn chu ngaihsak leh siam ṭhat a hlawh lo a ni. Helai kawng hi Karukol huam chhunga chengte tan a pawimawh em em a, South Garo Hills vela ni tin mamawh phur lut ṭhintute hman ber kawng a ni. Hetih lai hian thuneitute lam chuan he kawng dinhmun hi an ngaihtuah lo a ni," an ti. GSU te chuan NH-62 bakah PMGSY kawng siam zawh tura ruahman, la siam zawh si loh tam tak a awm thu sawi bawkin, thuneitute muangchang lutuk chu hriatthiam har an tih thu an sawi.

Garo zirlai pawlte hian nawrh an huaihawt chu tawp mai an tum loh thu leh, hmalakna a awm zui lo a nih chuan sorkar nawr tura nawrh huaihawt chhunzawm zel an tum thu an sawi bawk a ni.