AP : Airgun Surrender Abhiyan avangin UNESCO lawm

Arunachal Pradesh sorkar hmalakna, 'Airgun Surrender Abhiyan' chu Southeast Asia rama ramngaw leh nungcha bakah hnam rohlu humhalh kawnga UNESCO buatsaih, International Conference on Biosphere Reserve-ah fakna leh lawmpuina hun hman a ni. UNESCO buatsaih, International Conference on Biosphere Reserve hi Sabah, Malaysia-ah hman a ni.

Airgun surrender abhiyan hi AP department of environment and forest hmalakna niin, ramsa kah tihtlemna tur leh ramsa kahin a nghawng pawi tak takte inzirtirna puala tih a ni. UNESCO conference-ah hian Dehang-Debang Biosphere Reserve director, Dr. Damodhar chuan lawmpuina a dawng a, India Ministry of environment, forest and climate change aiawhin paper a present bawk.

UNESCO inter­national conference-ah hian Dr. Damodhar hian Arunachal Pradesh sorkar hmalaknaa Airgun surrener abhiyan hlawhtlinna leh thlen chinte documentary video hmangin a entir a, an rama sava leh nungcha dangte humhalh nana mahni duhthlannaa miin an silai leh license te an tun ṭhin thu te a sawi bawk a ni. March 17, 2021 khan East Kameng district-a Lumdung-ah bul ṭan niin, hetah hian silai 46 zet tun a ni a, Lumdung Arunachal Pradesh-a airgun awm lohna hmasa ber khuaa puan a ni zui a ni. Minister Natung leh CM, Pema Khandu te chuan hmalakna hi bawhzui zelin district zawng zawng deuh thaw an fang chhuak a, nungcha humhalh pawimawhna inzirtirna an nei zui zel bawk a ni.

He hmalakna avang hian sava pawh an pun phah nasa hle a, nungcha humhalhna kawngah pawh mipuite an ṭhanharh belh zel. Ram pumah leh khawvel huapa hriat a lo hlawh chhoh hnuah 6th North East Green summit-ah khan chawimawina hlan an lo ni tawh bawk. Prime minister Narendra Modi pawhin thla tina radio programme a hman ṭhin, 'Mann Ki Baat' ṭum 84-naah khan Arunachal Pradesh sorkar hmalakna chu chhuanawm a tih thu a sawi lang a ni.