Manipur-ah tribal pawlin NH-2 leh NH-37 dang

Manipur-a Sadar Hills Kangpokpi tribal pawl, Committee on Tribal Unity (CoTU) chuan nizan zanlai aṭang khan Manipur chhunga National Highway 2 leh National Highway 37 te chu tiam chin awm loin an dang. CoTU-te'n kawngpui an dan hi Kuki-Zo nute'n Kangpokpi district-a Gamgiphai-a nawrh an huaihawtna aṭanga rawt an ni.

CoTU hian Meitei tleirawl pahnih bo avanga Manipur police-te'n Kuki-Zo mi an man duh lohna lantir nan darkar 48 chhung Kangpokpi district shutdown an lo kalpui tawh a, hei hi November 13 zing khan tihtawp a ni tawh. Hemi hnu, Thawhlehni khan Kuki-Zo nute hian Gamgiphai-ah Kuki-Zo mi pahnih mante chhuah phut hian nawrh an huaihawt ve leh bawk.

Manipur police-te'n Kuki-Zo pahnih an mante hi Lhunkhosei Chongloi leh Satguogin Hangshing te an ni a, Kuki-Zo nute chuan inruk bo thu phuah chawp hmangin police-te chuan an man niin an sawi.

Thuneitute chu hnam pahnihte inkara buaina awm chungchanga ṭan bik neiah leh Kuki-Zo te laka dan kenkawh a nih dan chu a lai lo niin CoTU chuan a sawi. "Vawi tam tak inremna awm theih nan kawng hrang hrangin kan nawr tawh a, kan thil phutte erawh hnawl zel a ni. Hei vang hian kawngpui dan hi a ṭul niin kan hria a ni," tiin, Kuki-Zo mi pahnih an mante chhuah zalen chu democracy ram nihna anga an tih makmawh a nih thu an sawi bawk. CoTU chuan an pawl thutluknaah chuan an ding nghet a, rorelna dik a awm theih nan leh misual hrem an nih ngei theihna atan Kuki-Zo mipuite chuan an bei zel dawn tih an sawi bawk.