Tripura : Ruihhlo lo lut tam ber Mizoram ramri aṭanga lut a ni : SP

North Tripura superintendent of police, Bhanupada Chakraborty chuan an state chhunga ruihhlo hluar leh pung nasa lutuk chu a manganthlak thu sawiin, ruihhlo an man ṭhin tam zawk chu Myanmar aṭanga lo kal a nih thu leh, chungte chu Mizoram rawn paltlanga lo thleng an nih ṭhin thu a sawi.

SP chuan,"Mizoram leh Tripura hian km 107-a sei ramri kan inṭawm a, hei hi Tripura-a dan kengkawhtute tana harsatna thlentu a ni ve bawk a ni. Myanmar aṭang ruihhlo lo lut tam ber hi Mizoram nena kan ramri thui tak inṭawm aṭanga rawn lut hi a ni," a ti. Police te hian tun hma zawng aiin duty an bei ngawrh a, a bikin ramri leh a chhehvelah duty an indah belh a ni. Venhimna an tihkhauh chhan hi ramri aṭanga ruihhlo lut ru tur ven nan leh ruihhloin mipui a thlen loh nana ti an ni. Chakraborty chuan duty an bei ngawrh chung pawhin ramri kana ruihhlo tawlh ruk hi an la dang chat tawp thei lo niin a tarlang.