Manipur : State Journalist Award dawng turin journalist pariat thlan an ni

Manipur Directorate of Information & Public Relations (DIPR) chuan category hrang hrang pasariha kum 2023 state journalist award dawng tura thlante a puang.

DIPR thuchhuah chuan journalist chawimawina dawng turte hi anmahni editor-te ṭheuhin an rawtte niin, DIPR ruat judge panel-te'n heng journalist-te video leh thuchhuah dah khawmte an endik thung. Judge-te hian journalist chawimawina dawng tura editor-te rawt chhuah aṭang hian an thu lak khawm rintlak leh chhuah dik dan aṭanga tehin journalist pasarih an thlang chhuak leh a ni.

Sanaleibak Daily reporter, Robinson Wahengbam chu thingtlang khaw lam chanchin la khawm ṭhaah thlan niin; Sanaleibak Daily sub-editor; Taorem Bishwajit Singh chu vantlang hriselna leh thianghlimna category-ah chawimawina dawng tura thlan a ni thung. Hmeichhia leh naupangte chungchang chhuah ṭhaah TOM TV reporter, Khairibam Yaiphaba Meitei chu chawiawina pek a ni ang. Infiamna chanchinthar la khawm ṭha chawimawina dawng turin Asem Chandrashekhwor Singh, Sanaleibak Daily sub-editor thlan a ni bawk a, category pahnih; art and culture leh parliamentary chanchin la khawm ṭhaa chawimawina dawng tur atan Sanaleibak Daily reporter, Maibam kenedy Singh chu thlan a ni bawk. Science and Technology lam report ṭha chawimawina chu Sanaleibak Daily reporter vek, Moirangthem Khagemba Meetei hnenah hlan a ni bawk dawn a ni.

DIPR chuan kum 2023 atan judge-te chuan Best editor award on National Integration & communal harmony chu thlan loh mai ni se tia an rawt thu a tarlang bawk.

State Journalist Award hi vawiina Chief Minister's secretariat-a Durbar hall-ah National Press Day Observation hmannaah hlan an ni ang.