Manipur : In leh lo chante tan housing scheme tlangzarh
Manipur sorkar chuan tualchhung buaina chhuak avanga in leh lo chante tana in sakna tur ṭanpuina, housing scheme a tlangzarh. He scheme hi Kuki leh Meitei-te inkara buaina chhuak avanga an in tihchhiatsak leh halsak te tana ruahman a ni. Manipur-a tualchhung buaina chhuak avang hian Manipur-a hill district leh valley district-ah in 4,800 aṭanga 5,000 tihchhiat niin thuneitute chuan an sawi.
Sorkar chuan housing scheme an tlangzarh takah hian concrete in chante chu Rs. nuai 10 pek an nih tur thu an sawi a, semi-pucca in chante ṭanpui nan Rs. nuai sarih leh thinga sak in chante chu Rs. nuai ngaa ṭanpui an nih tur thu an sawi. Hei bakah hian in chhia emaw kang bang emaw siam ṭhat lehna tur ṭanpuina hi pek a nih tur thu sawi bawkin, ṭanpuina an sem chhuah zat chanve emaw, in siam ṭhat senso zawng zawng aṭanga a tlem zawk zawk ṭanpuina pek an ni ang.
Chief minister N. Biren Singh chuan in leh lo tlanchhiatsante tana chenna lailawk tur sak mek a nih thu sawiin, heng in sak mekte hi prefabricated an nih thu leh, Rs. vbc 149 ruahman a nih thu a sawi bawk. CM chuan an in leh lo awmna dik takah an in tur sak leh vek a ni ang tiin a sawi. Thla hmasa khan chhungkaw 3,000 chu relief camp aṭangin sorkar sak inah hian sawn an lo ni tawh a ni.
Tribal pawlin inrelbawlna hran siamah vau
Tribal pawl, Indigenous Tribal Leaders Forum (ITLF) chuan Nilaini khan Kuki-Zo tribal te chunga rawng taka chetna thleng duh lohna lantirin, Churachandpur-ah kawngzawh an huaihawt a, tel an ṭhahnem hle.
Kawngzawhnaa tel hian Manipur tualchhung buaina thlengah, state sorkar chuan Meitei-te'n tribal mite an beihna chungchang an chhui danah hleih neih taka thil kalpuiah an puh. Tribal mite tawrhna leh beih an nih dante hleih nei loa chhui turin an ngen a, July 2-a David Theik thah a nih dan leh, May 4-a MLA Vungzagin Valte leh a driver Thanghoulal beih an nih dante chu CBI chhuitir an phut a ni.
ITLF chuan sorkar laipui hnenah hriattirna pe bawkin, an thil phutte ngaihvensak an nih loh chuan, Kuki-Zo tribal area-ah inrelbawlna hran kalpuiah an vau. Tualchhung buaina thlengah hleih nei taka Manipur sorkarin a enkawl dan chungchanga memorandum an siam chu union home minister Amit Shah leh Central Bureau of Investigation director Praveen Sood hnenah an thawn bawk.