Nagaland : District pathumah Viksit Bharat Sankalp Yatra tlangzarh

Tribal-te chawi kanna atana ruahman, Viksit Bharat Sankalp Yatra (VBSY) chu Nagaland-a district pathum, Dimapur, Mokokchung leh Tuensang-ah te Nilaini khan tlangzarh a ni a, Dimapur-ah chuan Indisen-ah National Recruitment Agency secretary, Sanjeeb Kumar Mishra chuan tlangzarhna hun hi a hmang a ni.

VBSY hi ram pum tuam chhuak tura tribal-te dinhmun chawi kanna kawnga beihpuithlakna niin, PM Modi chuan he hmalakna hi Jharkhand-ah a hawnna hun a hmang tawh a ni. VBSY beihpuithlak thawh khatna hi district pathumah hian kalpui hmasak phawt tum a ni a, hemi atan hian van pahnih buatsaih ni bawkin, Dimapur atan van pahnih leh Tuensang leh Mokokchung te tan van pakhat ve ve buatsaih a ni bawk.

VBSY atan hian Sanjeeb Kumar Mishra bakah Dimapur DC, Dr. Tinojongshi Chang, leh Dr. Raut Pandurang te chu Prabhari atan ruat an ni a, Dimapur-a hawnna hun hmannaah hian central sorkar leh state sorkar hnuaia official bakah, scheme hrang hrang aṭang hamṭhatna dawng tawhtu te, veng leh khaw hruaitu bakah, khaw mi leh zirlaite pawh an tel bawk a ni. Mishra chuan VBSY chu sorkar laipui thil tum ropui tak a nih thu leh, ram pumin 2047 hmaa hmasawnna kim kan neih theih nana hmalakna ṭha tak a nih thu a sawi.

Dimapur ang hian Tuensang-ah chuan VBSY beihpuithlakna hun hawnna hi Ngangpong khuaah neih niin, khaw mite bakah district thuneitute nen hun hman a ni a, Mokokchung-ah pawh Mokokchung ADC, Chumlamo Humtsoe chuan Ungma khuaah hawnna hun hi a hmang ve bawk.