Assam Minister Atul Bora vau chungchangah mi pakhat man

Social media kaltlanga Assam agriculture minister Atul Bora vau a nih chungchangah Director General of Police, Gyanendra Pratap Singh chuan mi pakhat an man thu a puang.

Minister Bora-a'n thaha vauna a dawn chungchangah hian Assam police hnuaia Criminal Investigation Department (CID) chuan thubuai theh lutin an chhui zui nghal a ni.

Atul Bora hi Asom Gana Parishad-ah president ni lai niin, tuna vauna a dawn hma hian mi pakhat, United Liberation Front of Asom (ULFA) helpawl mi nia insawi hnen aṭangin bomb a nih tur thu vauna a lo dawng tawh bawk a ni.

DGP, GP Singh chuan,"Facebook kaltlanga post siamin minister hi vau a ni a, hemi kaihhnawihah hian Sivasagar district-a Bamun Moran khua aṭangin mipa kum 31 mi kan man tawh a ni. Kan aiawha mipuite'n kan thlan ram hruaitute laka vauna engmah hi kan ngaizam mai mai dawn lo a, hei hi democracy kalh tlat thil a ni bawk," tiin a sawi.