Manipur sorkarin ITLF lakah action la dawn
Manipui sorkar chuan tribal pawl, Indigenous Tribal Leaders' Forum (ITLF)-in an state-a Kuki-Zo te chenna, district pathuma mahnia ro inrelna siam tuma vau a, hemi chungchanga sorkar hnenah hun tiam an siamsak avangin ITLF chungah action lak a tum.
ITLF hian tualchhung buaina thleng mekah, BJP kaihhruai state sorkar hi hleih nei taka ro rel leh, tribal-te ngaihsak loah puhin nawrh an huaihawt a ni. An nawrh huaihawtnaah an thil phutte sorkarin a ngaihsak loh chuan district pathumah mahnia ro inrelna kalpui an tum thu an sawiin, sorkar chu hriattirna an pe a ni.Mahnia rorelna hran din tura a sawi district pathum zingah hian Churachandpur, Kangpokpi leh Tengnoupal te an sawi tel.
Hemi chungchangah hian Manipur sorkar chuan thuchhuah siam nghalin, ITLF-in mahnia ro inrelna tur chungchang thutawp a siam chu a dem thu leh, an thiltih tum dan chu Manipur boruak tichhe thei a nih thu a tarlang. "ITLF thuchhuah hian dan ṭan chhan a nei lo a, constitution aṭang pawhin a dik hek lo. Tihtirtu an awm ni ngeiin a lang a, an pawl a ni emaw, midang inrawlh pawh lo awm se, he thila bul tumtu lakah hian na taka action lak tum a ni," tih sorkar thuchhuahah chuan a tarlang.
ITLF te hian November 15 khan nawrh huaihawtin kawng an zawh a, he kawngzawhnaah hian sorkarin an beisei anga rorelna hran a pe lo a nih chuan Kuki-Zo awmna district pathumah te chuan mahnia ro inrelna puang a, chief minister hran pawh an neih tur thu an sawi a ni.
PLA/RPF-in AR ambush-tu an nih thu sawi
People’s Liberation Army, (PLA) political wing, Revolutionary People’s Front (RPF) chuan Ningania Myanmar ramri bul, Tengnoupal district-a improvised explosive device (IED) hmanga Assam Rifle team ambush-tu an nih thu an sawi.
RPF assistant publicity secretary, Bangkim chuan thuchhuah siamin, border town Moreh aṭanga km 20 vela hla, Narum leh Saibol khaw inkarah zing dar 8:00 vel khan AR team hi an bei niin an sawi. AR lam pawh hian kap letin minute 30 chuang a inkap a ni. He inbeihna thlenna hmunah hian Tengnoupal district police team leh AR sipai pawh tirh luh belh an ni a, mahse, man an nei lo. Inbeihna thlengah hian thi leh hliam an awm lo nia hriat a ni bawk.
PLA chuan May 3-a Meitei leh tribal inkara buaina a chhuah hma zawng khan border town-ah chuan inngeih tlang leh boruak muanawm tak hnuaiah hnam hrang hrangte an khawsaho tih an sawi. Mahse sorkar laipuiin May 3 hnua inṭhen darhna policy a kalpui hnuah Moreh khuaah ngei pawh tharum thawhna leh buainate a chhuak a, thil awmdan thlithlai tur hian PLA chuan special team hi a tir niin an tarlang.