Manipur-ah complete lockdown pawtsei

Manipur sorkar chuan hripui leng vanga complete lockdown a puan chu August 31 thleng atan a pawtsei leh. 

Inrinnia chief minister N Biren Singh hoa cabinet minister meeting-ah an state-a hri kai an pun belh zel avang leh, hmun danga zin chhuahna nei lo zingah hri kai hmuh chhuah an awm thar reng avangin lockdown pawhsei hi an rel a ni. 

Chief secretary Rakesh Kumar chuan inkharkhip chhung hian mipuite harsatna an tawh lohna turin essential service bikah chuan ngaihnathiamna a awm dawn tih a sawi. Manipur-ah hian Inrinni khan hri kai hmuh chhuah thar mi 192 awmin, an state-a hri kai hmuh chhuah tam ber ni a thleng leh. Hri kai hmuh thar zingah hian Central Armed Police Force (CAPF) mi 131 an tel a, pawn lama zin chhuahna nei lo mi 46 an awm tel bawk. 

State pumah hri kai hmuh tawh hi 4,390 an ni tawh a, an zingah hian sipai mi leh sa 1,091 an tel. Hri kai zinga 2,438 chu an dam tawh a, enkawl mek 1,939 an awm.