Economy hmasawnna atan task force din a ni : Meghalaya CM
Meghalaya chief minister Conrad K Sangma chuan Inrinni liam taa Independence Day lawmnaa thu a sawiah, an state economy-in hma a sawn theihna turin a buaipuitu tur task force din a nih thu a sawi.
CM chuan task force-te hian short, medium leh long term atana state economy hmasawnna tura rawtna hrang hrangte siamin, an rawtna behchhan hian state sorkar chuan "Restart Meghalaya Mission" a siam nghal a ni, a ti.
"Meghalaya Mission" hi loneitu, entrepreneur leh sector hrang hrang hnuaia hnathawkte chawikanna tur programme a nih thu CM chuan a sawi a, hem atan hian kum thum chhungin cheng vaibelchhe 14,515 ruahman a ni a, sorkar kum kal mek atan cheng vaibelchhe 7,839 ruahman a ni, tiin a sawi. Sangma chuan scheme leh project hrang hrang a kalpui mek thu sawiin, heng zingah hian National Rural Livelihood Mission leh Pradhan Mantri Awas Yojana pawh a tel tih a sawi. State sorkar chuan 'Jal Jeevan Mission' pawh chak taka kalpuiin, kum 2022-ah chuan state chhung chhungkaw 5,89,000 te chu an in chhungah ngei tui an herh haw theihna turin hma a la ni, a ti.
Covid-19 leng mek dona kawnga state sorkar hmalakna hrang hrangte sawiin, Sangma chuan India ram state zingah hri leng tuar nep pawl an nih thu a sawi. State chhungah testing centre 12 awmin, RT-PCR mode hmangin nitin sample 1,000 an test theih thu a sawi bawk. Meghalaya-ah hian hri kai hmuh chhuah hi 1,292 an awm tawh. Inrinni khan hri kai hmuh chhuah thar mi 64 an awm leh a, hri kai enkawl mek mi 15 an dam bawk. Hri kai hmuh tawh zinga mi 596 chu enkawl dam an ni tawh a, hri kai mek hi 690 an la awm.