Assam MP thlan-ah Congress-in hnehna chang

Assam state-a rorel lai Cong-ress party chuan Rajya Sabha inthlanah hnehna a chang.

Thawhṭanni khan Rajya Sabha member tur hi thlan a ni a, Congress candidate Ranee Narah leh Ripun Bora te chu thlan tlin an ni. Independent candidate Mahavir Prasad Jain chu first preference vote pakhat pawh a hmu zo lo.

MLA 114 awmna Assam state-ah hian MLA 86 ten vote an thlak a, Ripun Bora chuan vote 38 hmuin, Ranee Narah chuan vote 47 a hmu ve bawk. Vote thlak zingah hian Congress MLA Robin Bordoloi vote chu a thi a ni.

All India United Democratic Front (AIUDF) party lam chuan vote thlak hma hian Rajya Sabha member thlanna chu an boycott dawn tih an lo sawi lawk a, mahse an party MLa panga chuan vote an thlak tho a ni. AIUDF MLA te chuan Ranee Narah an thlawp tih an sawi bawk. Tun hnai khan AIUDF MLA pahnih chuan congress party an zawm a ni.

Bodoland People's Front (BPF) MLA hel Hitesh Basumatary chuan Independent MLA Zabed Islam a thlawp a, Congress MLA pahnih Amiya Gogoi leh Rameswar Dhanowar te chuan MP thlanna-ah hian vote an thlak loh bakah, Trinamool Congress MLA Dwipen Pathak leh Independent Jatin Mali te pawhin vote an thlak lo.

Assam Pradesh Congress Committee (APCC) hruaitu Anjan Dutta chuan Rajya Sabha inthlan result chu an beisei ang a nih thu leh state inthlanan hmachhawn turah pawh hnehna an chan ngei a rin thu a sawi. "Congress chuan engtik lai mahin All India United Democratic Front (AIUDF) te thawhpui turin kan sawm ngai lo a, amaherawh chu an MLA panga ten kan party-ah rinna an nghat a, kan party an zawm chu kan lawm tak zet a ni. An ni pawh hi ticket kan pe dawn lo a ni" tiin Dutta chuan a sawi.

Dutta chuan sawi chunzawmin, BJP chuan assembly election-ah seat 20 aia tam an lak a rin loh thu a sawi a, Sarbananda Sonowal ngei pawh Majuli bialah a tlin a rin loh thu a sawi bawk.

Rajya Sabha member atana thlan thar Ripun Bora chuan lawmthu sawiin, hei hi a bulṭanna chauh a la ni, a ti a, state inthlap lo awm turah an chak leh chak loh chuan thil thui tak a hril tur thu a sawi bawk. Ranee Narah pawhin theih tawp chhuaha hna thawh a tum thu a sawi a ni.

Hetih lai hian Jain chuan MLA tam takin vote an thlak lo chu vanduai thlak a tih thu a sawi a, "Vote tura ka sawm ngawt thei an ni lo a, an mawhphurhna a ni tih an hriat a ngai a ni" a ti.

Rajya Sabha member ni lai, Pankaj Bora leh Naznin Faruque te term chelh lai mek chu April 2 hian a tawp dawn a, thlan thar Ranee Narah leh Ripun Bora te chuan an thlak ve tawh thung dawn a ni.