AP Assembly-ah eptu party chhuak tau

23rd March, 2016

Arunachal Pradesh Assembly Budget session neih mekah Thawhṭannni khan eptu party Congress MLA te chu lungawi lovin House aṭangin an chhuak tau.

Assembly session-ah hian Meghalaya chief minister hlui leh Union Minister hlui ni bawk PA Sangma sunna hun Speaker Wangki Lowang-a hoa neihna nih dawn laiin congress MLA te chuan House hi an chhuahsan a ni.

Congress MLA hel, party chhuahsana sorkar thar February 19-a siamtu Kalikho Pul-a chief minister a nih hnua assembly budget session hmasa berah hian Congress MLA 15 zinga pariat chauh an tel. Chief Minister hlui Nabam Tuki leh Speaker Nabam Rebia te chu he session-ah hian an tel lo thung. Home Minister hlui Byaling chuan, court-ah thubuai a awm mek avangin session lo neih chu thil dik lo a nih thu House an chhuahsan hma hian a sawi a, House an chhuahsan chhan pawh a nih thu a sawi a ni.

Congress MLA te chetdan hi chhangin Parliamentary Affairs Minister Wanglin Lowangdong chuan, Chief Minister Kalikho Pul kaihhruai People’s Party of Arunachal (PPA)-in assembly budget session a buatsaih chu dan ang thlap a nih thu leh India danpui kalh en gthil mah a awm loh thu a sawi.

Arunachal Pradesh Chief Minister Kalikho Pul chuan March 18-a Parlia-mentary Secretary a ruatte hna chanpual tur a puang a, an zingah hian rorel lai People’s Party of Arunachal (PPA) mi 13 bakah Independent pahnih an tel. Nabam Tuki hun laia minister Pasang Dorjee Sona leh Tirong Aboh te chuan tun thlengin thutiam an la la lo thung.

Punji Mara chuan Horticulture, Rural Development & Panchayati Raj a chang dawn a, Deputy Speaker hlui Jomde Kena chu State Transport and Land Management chang tura tih a ni. An ni bakah hian an department chan tur te chu hetiang hian siam rem a ni - Alo Libang (PHE & WS), Gum Tayeng (Water Resources), Tapuk Taku (Power, Electrical), Jambey Tashi (Rural Works), Tatung Jamoh (Industries and Agriculture), Zingnu Namchoom (Tax & Excise and Textile & Handicrafts), Mutchu Mithi (Sports & Youth Affairs, PWD), Paknga Bage (Home) leh Tsering Tashi (Education) te a ni.