AP CM-in state budget a pharh Sum indaih lohna vaibelchhe 367.58

Arunachal Pradesh Chief Minister Kalikho Pul chuan Thawhlehni khan kum 2016-17 atana state budget a pharh a, sum duh khawp lohna chu vaibelchhe 367.58 a nih thu a sawi.

Sorkar kum thara mipuite aṭanga chhiah hmuh tura beisei chu vaibelchhe 12,805 a ni a, hman ral tura ruahman chu vaibelchhe 13,172.58 a ni.

State tax revenue bik aṭanga sum hmuh tura beisei chu vaibelchhe 670.66 a ni a, chu chu sorkar kum kal mek aiin 20 % in a tam zawk. Non-tax revenue aṭanga sum hmuh tura beisei chu vaibelchhe 528.90 a ni a, hei pawh hi kum hmasa aia a sanna chu 7.4% a ni. Hei bakah hian state sum thawh chhuah tura beisei zawng zawng chu vaibelchhe 1,199.56 a ni bawk.

14th Finance Commission (FFC) hnuaia kum 2016-17 chhunga Arunachal Pradesh-in sorkar laipui aṭanga tax a chan tura a rawt chu vaibelchhe 9,157.4 a ni. Mahse sorkar laipuiin Union Budget hnuaia a ruahman sak chu vaibelchhe 7,868.9 niin, hei hi 14th Finance Commission rawtna aiin a tlem zawk a ni. Annual Plan atana state sum hmuh tur chu vaibelchhe 6,569 a ni a, hei hi kum kal lai mek aiin 14% in a tam zawk a ni.

Chief Minister Kalikho Pul chuan sorkar kum tharah hian zirna, venhimna, inkal pawhna kawngpui, eng, faina, thlai chin leh huan neih, industry leh tourism te ngaihpawimawh a nih tur thu a sawi.

State budget pharh takah hian health sector bik atan vaibelchhe 973.97 ruahman a ni a, education sector atan 1,985.98 ruahman a ni bawk. Zirlai a bikin BSc (Nursing) zirte, ANM leh GNM course zirte tan thlatin stipend 1,400 ruahman a ni. Heng bakah hian annual book grant atan BSc nursing Rs 3,000, GNM Rs 2,000 leh ANM zirlaite tan 1,000 ruahman sak an ni bawk.

Pul chuan 'drug de-addiction centre' Pasighat, Tezu, Hayuliang, Khonsa, Chang^-lang leh Longding-ah te din a nih tur thu a sawi a, hemi atan hian cheng vaibelchhe 16 ruahhman a nih thu House a hrilh bawk.