Indo-Bangla powerline hawng

Prime Minister Narendra Modi, Bangladesh Prime Minister Sheikh Hasina leh Tripura Chief Minister Manik Sarkar te chuan Nilaini khan India-Bangladesh power grid transmission line hawna video-conference hmangin an nei.

Hei hi India leh a ṭhenawm ram Bangladesh te thawhdunna kawng pawimawh te zing a mi a ni a, Surjyamaninagar, Tripura aṭangin power hi pek chhuah a ni ang a, South Comilla, Bangladesh-a a thleng ang. Tripura aṭanga Bangladesh-a power hralh chhuah tur hi 100 megawatt a ni dawn a, Internet 10 GBPS chu Cox’s Bazar, Bangladesh
aṭangin Agartala-ah chawk luh a ni ve dawn bawk. Hei hi a bikin hmarchhak state-a internet chak ṭha zawk mipuiten an hman theih nana hmalakna a ni. Video conference hi heng hruaitu pathumte hian an mahni office ṭheuh - New Delhi, Dhaka leh Agartala aṭangin an nei a ni.

Narendra Modi chuan, ṭhenawm ram Bangladesh nen inzawmna ṭha tak a awm thei chu lawmawm a tih thu a sawi a, tui leh khawmualah mai nilo digital-a inremna an siam thei chu hma sawnna a nih thu a sawi. International Internet Gateway (IIG) zingah hmarchhak state, Tripura a tel thei chu hmarchhak pum tan thil chhinchhiah tlak tak a ni thu leh, hmarchhak ṭhalai a bikin Assam, Tripura leh Sikkim te tan a ṭangkai zual dawn niin a sawi bawk.

Tripura Chief Minister Manik Sarkar pawhin India leh Bangladesh thawhdunna chuan ram pahnih tan hmasawnna nasa tak a thlen ngei a rin thu a sawi a, chung zinga Tripura a tel thei chu thil chhinchhiah tlak tak a ni,a ti bawk. Tripura Power Minister Manik Dey pawhin thu sawiin, India company NTPC Vidyut Vyapar Nigam Ltd. (NVVN) leh Bangladesh Power Development Board (BPDB) ten inremna thuthlung an siam thei chu lawm-awm a tih thu leh, hawn a ni ta chu ropui a tih thu a sawi. Bangladesh hnenah hian Tripura sorkar chuan power unit khat cheng 5.5 zelin a hralh dawn a, sorkar laipuiin a rem tih chuan state sorkar chu power tam zawk hralh chhuak turin a inpeih reng a ni, tiin Dey chuan a sawi.