Congress-in manifesto tlangzarh

Assam Chief Minister leh Assam Congress Legislative Party (ACLP) hruaitu Tarun Gogoi Ningani khan assembly in-thlan an neih tur atana an party manifesto chu Rajiv Bhawan-ah a tlangzarh.

Manifesto hi phek 54 a chhah a ni a, kum 15 liam ta chhunga an party hnathawh ṭhat te tarlan a nih bakah an party hmalakna avanga state-in health, education, power leh PWD-a hma a sawnna te tarlan a ni. Kumin inthlana an party au hla tur chu ‘Ekla Chalo’ tih a nih bawk.

Congress party manifesto-ah hian eizawnna nghet neilo chhungkua-a mi pakhat talin hna a neih theih nana hmalak te, chhungkaw harsa zual bik hnehah Rs 1,000 pek te a tel. Gogoi chuan mipuite chuan vote tur an hria niin a sawi a, BJP in Delhi-a rorelna fawng an chelh leh, AGP ten Dispur-a sorkarna an chang chu state mipuite tan chuan hun thim ber niin a sawi. Congress hian kum 15 chhung Assam-ah hian sorkarna an siam tawh a, state leh mipui tan hna an thawk ṭhain hmasawnna pawh hmuh theihin a ṭhang chak a ni, Gogoi chuan a ti.

Assam Pradesh Congress Committee president Anjan Dutta state chuan hmasawnna kawng a zawh mek zel tih sawiin, chunzawm zel a nih theih nan mipuite chu an party vote turin a sawm bawk.

BJP leh AIUDF te chuan Congress party rorelna chu paihthlak ngei tumin ṭan an khawh mek a, inthlan boruak pawhin a vawrtawp a thleng chho mek. Sorkar laipuia party hruaitu lawkte pawhin Assam State Election hi an ngaihven hle a, sorkarna siam ngei tumin ṭan an la nasa hle.

Union Finance Minister leh BJP hruai-tu lawk Arun Jaitley chuan nimin khan an party manifesto 'vision document' chu a tlangzarh ve bawk. Tlangzarhna hunah hian Jaitley chuan thu sawiin, BJP chuan chuan thil mak leh chhinchhiah tlak a thlen tir dawn niin a sawi a, Congress party rorelna chu BJP chuan a luahlan dawn a ni, a ti. Party manifesto chungchang sawiin, Union minister chuan 'Vision Document' chu kum 2016-2025 chhung atana state hmasawnna turte a ni a ti a, sorkarna siam turin a inring tawk hle.

Prime Minister Narendra Modi chuan vawiin hian ni hnih cham turin Assam chu a tlawh dawn a, Tinsukia, Majuli, Bihpuria, Bokakhat leh Jorhat-ah te vantlang inkhawmah thu a sawi ang. Naktukah Rangapara leh Hailakandi-ah te vantlang inkhawmah thusawi tura beisei a ni bawk. Ani bakah hian BJP National president Amit Shah chuan Sivasagar leh Sonari-ah te March 25 khan vantlang inkhawmah thu a lo sawi tawh bawk.

Assam inthlan hi thawh hnih-a neih tur a ni a, a thawh khatna chu April 4
khian neih a ni dawn a, a thawh hnihna chu April 11-ah neih a ni thung ang, seat awm zawng zawng hi 126 a ni.