Khualzin hip turin environment-in a tuar kher a ngai lo : Meghalaya CM

Meghalaya chief minister, Conrad K. Sangma chuan an state-in khualzin hipna tura hmalakna thar an neih tur thu puangin, he an hmalaknaah hian state sun dinhmun tiṭha tura kawng an zawhnaah environment-in a tuar loh dan tur an zawn thu a sawi.

Chief Minister chuan khualzin tam zawk hip tura ṭan an lak rualin, an state tinuamtu leh tihlutu, ramngaw leh nungchate humhalh chu thupui berah an neih tur thu a sawi a ni.

Meghalaya sorkar hian ramngaw leh nungchate dinhmun a derthawnna hmunte zir chianga hre chungin, hmasawnna hna an kalpuina turah heng hmunte hi zuah vek an tum. Thil nung dangte tana him lo thei a nihna hmunah chuan eng hna mah an thawk dawn lo a ni. Sangma chuan,"Hetiang thiltih hi harsa tak a ni. Meghalaya-ah chuan ram neitu nihna hi sorkar ni loin hnam chengte ta a ni a, hmun ṭhenkhat phei chu kum 100 chuang khawsak tawhna te a awm bawk. Tum mumal leh nghet tak neih a ngai a, mipuite thlawpna pawh kan mamawh em em," tiin, khaw chhung aṭanga New Shillong Township-a secretariat sawn chuan khawpui tawt a tihziaawm a beisei thu a sawi bawk.

"Tourism ṭhanna hian hna nuai chuang a siam belh turah kan ngai a, tourism hmasawnna atan pawh hian kawng hrang hranga hmalak tum a ni. Khualzinte mamawh leh thlenna tur ṭha zawk buatsaih te, kawng siam ṭhat te, khualzinte tawn tur thil danglam tak lo buatsaih leh, culture humhalh chunga pho chhuahna siam te chu kan hmalakna tur langsar zual a ni," tiin CM chuan a sawi.

Sangma hian tualchhung mi sumdawnna bul ṭante ṭanpuina tur ruahman a nih thu sawiin, Cherrapunji velah te chuan homestay leh villa te siam ni se a duh thu a sawi. Cinema hall leh khualzinte hman tur lirthei buatsaihna bakah, tourism tana ṭangkai tur hmasawnna ruhrel din nan Rs. vbc 2,000 - 2,5000 ruahman a nih thu a tarlang bawk.