Modi-an Assam a tlawh

Prime Minister Narendra Modi chuan ni hnih chamin Assam a tlawh a, Pathianni khan election rally, Rangapara Sonitpur district-ah a buatsaih.

Election Commission chuan 14th Assam assembly election hi April 4 leh 11-ah neih turin ruahmanna a siam fel tawh a, May 19-ah vote tla te hi chhiar a ni ang.

Prime Minister Modi hian a vawikhat-na atan Barak Valley tlawhin thu a sawi a, Barak Valley chu Bharatiya Janata Party (BJP) tan hmun pawimawh tak a nih thu te a sawi. State inthlan an hmachhawn turah helai biala seat awm zawng zawng 15 chu BJP te hian an chuh vek dawn a ni. Barak Valley-ah hian April 4 khian vote thlak a ni ang. Prime Minister-in Barak Valley a tlawh ṭum hian BJP candidate 15-te chuan PM hi an ṭawiawm vek a, anni bakah hian party hruaitu senior
ṭhenkhatte pawh an tel bawk.

Rangapara-a thu a sawiah, PM chuan an party-in thil tum pathum an nei tih a sawi. An party thil tum pathum a sawi te chu, hmasawnna a ni a, a dawt leh ah chuan hmasawnna chak taka kalpui a ni a, a tawp ber leh a opathumna chu kawng engkima hmasawnna kalpui te a ni.

Modi chuan, "Ka suangtuahnaah chuan kum 2022 khian chhung tinte chu an mahni in leh lo-ah an khawsa thei dawn a ni. Hei hi thil hautak tak a ni a, amaherawh chu kan tum dawn a ni", a ti. Prime Minister Narendra Modi chuan Assam-ah thil a inthlak thleng mek niin a sawi a, Congress party-in kum 15 chhung zet thuneihna a lo chan tawh chu tih danglamin a awm dawn niin a sawi.