Northeast Business Summit Manipur-ah neih a ni dawn
Sorkar laipui chuan ni thum awh tur Northeast Business Summit Manipur-ah neih tumin ruahmanna a siam mek.
Ruahman dan chuan Arpil 7 aṭangin Northeast Business Summit ṭan a ni ang a, hmarchhak bialin leilung hausakna a neih te leh hei hian hmasawna a thlen theih dan te inzirtirna leh inhrilhhriatna atan buatsaih a ni. North East Business Summit 2016 hi Union Ministry of Develop-ment of North Eastern Region leh Manipur sorkar ṭangkawp ten an buatsaih a ni a, Imphal-ah neih a ni ang.
Northeast Business Summit hi sorkar laipuiin a kalpui mek Act East policy denchhena neih tur a ni dawn a, hmarchhak biala trade and commerce, micro, small and medium enterprises, horticulture, floriculture and food processing industry te chu sawm vek an ni. Heng bakah hian handicraft, handloom leh ministry of tourism te chu tel tura sawm an ni bawk.
Hei hian Association of Southeast Asian Nations (ASEAN) ramte nena insumdawn tawnna tha zawk a awm theih nan te, food processing, horticulture, tourism, handloom and handicrafts, leh entrepreneur te tih hmasawnna tura buatsaih a ni.