Covid-19 Hmarchhak dinhmun

Khawvela hripui, Covid-19 leng mek chuan India ramah ziaawm lam a la pan thei lo a, hmarchhak bialah pawh hri kai hi hmuh chhuah belh zel an la ni. 

Nagaland

Nagaland health minister S Pangyu Phom chuan nimin khan an state-ah hri kai hmuh chhuah belh mi panga an awm tih sawiin, hri kai hmuh hi mi pakua an tling ta a ni. 

Nimina hri kai hmuhte hi Chennai aṭanga haw vek an ni. An zinga pali chu Dimapur mi niin Kohima mi pakhat a tel bawk. Hri kai hmuhte hi Dimapur leh Kohima-a Covid-19 hospital-ah enkawl nghal an ni tih minister chuan a sawi. 

Minister chuan hri kai hmuh belh zel ni mah se mipuite chu chiai lo turin a chah a, "Hmun hrang hranga tangkhang, kan state mite hruai haw kan tum khan he hri lakah hian ka fihlim thei bik kher lo ang tih pawh kan hria a ni. Hri leng chungchangah tumah kan inthliar tur a ni lo a, theihtawp chhuahin hri leng dona kawnga kan thawhho vek a ngai a ni," a ti. 

Meghalaya

Meghalaya-ah pawh Delhi leh Haryana aṭanga haw mi panga chu Covid-19 an kai tih hmuh chhuah a ni leh bawk. 

Chief minister Conrad Sangma chuan nimin zing khan hri kai hmuh chhuah belh an nih thu hi sawiin, an panga hian Shillong-a Corona Care Centre-ah an awm thu a sawi. Meghalaya-ah hian hri kai enkawl lai hi mi pasarih an awm a ni.

State sorkar chuan hmun dang aṭanga hawte a tam thei ang ber sample test sak a tum tih a sawi a, Thawhlehni thleng khan sample 6,553 test a ni tawh tih a sawi. Lockdown avanga tangkhang, state dang aṭanga haw hi mi 9,936 an awm tawh tih sawiin, Rajasthan leh Andhra Pradesh aṭanga special train hmanga haw an awm mek thu leh, Delhi leh Kerala aṭangin nizan khan special train a chhuah leh tur thu a sawi bawk. 

Assam

Assam-ah Covid-19 kai hmuh chhuah an pung chak hle a, nimin khan he hri kai hmuh tawh hi mi 774 an awm tawh a ni. 

Assam health minister Himanta Biswa Sarma chuan nimin zing khan hri kai mi pali hmuh chhuah belh an ni tih sawiin, Nagaoan leh Dhemaji-a mite an ni tih a sawi bawk. 

Hri kai hmuh chhuah an pun chhoh zel avangin Hailakandi district-a SK Roy Civil Hos­pital chu Covid-19 kaite enkawlna atan hman belh a ni. Deputy Commissioner Megh Nidhi Dahal chuan hospital-a khum 20 chu hri kai te enkawlna tur bik atan dah a ni tih a sawi. 

Hmun danga tangkhang haw an tam avang leh, haw zinga tam takin hri an kai tih hmuh chhuah belh zel a nih avangin Guwahati-a Institute of Advanced Study in Science and Technology (IASST)-ah microbiology laboratory thar siam a nih thu Health Minister chuan a sawi. Lab hi hman theih tura peih a ni thuai dawn tih sawiin, Covid-19 sample test pawh tam zawk an nei thei dawn tih a sawi a ni. . 

Parliamentary affairs minis­ter Chandra Mohan Patowary chuan hri kai hmuh chhuah belh an nih zel avangin sorkar chuan hmun dang aṭanga hawte chu home quarantine phalsak an ni tawh dawn lo tih a sawi. Quarantine dante chu khauh taka kenkawh a ni ang, a ti. An state-a hri kai hmuh zinga a tam ber chu hmun dang aṭanga rawn lut an ni tih a sawi bawk. 

Tripura

Tripura-ah Thawhlehni zan khan Covid-19 kai mi 23 hmuh chhuah belh niin, heng zinga 18 chu special train hmanga Mumbai aṭanga haw an ni a, mi dang panga chu rela chuangte nena inhnaihna nei an ni bawk. 

Tripura-ah hian hri kai hi mi 232 hmuh an ni tawh a, a tam zawk chu enkawl dam tawh  niin mi 65-te enkawl mek an ni.

Manipur

Manipur-ah Thawhlehni zan khan hri kai pahnih hmuh chhuah belh an ni a,an state-a hri kai hmuh hi mi 41 an tling ta a ni. 

Hri kai hmuh chhuah belhte hi Thoubal district-a mi an ni a, Imphal-a Regional Institute of Medical Sciences (RIMS) Hospital-a Virus Research and Diagnostic Laboratories (VRDL)-ah an sample test a nih hnuin, Thawhlehni zan khan hri hi an kai tih hmuh chhuah a ni.