Sikkim zirlai pawlten zirna in hawn la duh lo

Sikkim sorkarin June 15 aṭanga zirna in hrang hrangte hawn a tum chu zirlai pawl hrang hrang chuan an duh lo a, a thutlukna hi sut leh turin sorkar an ngen. 

University Students Association (SUSA), government college hrang hranga Students Representative Council, Sikkim State University leh Nar Bahadur Bhandari Degree College zirlai aiawh bakah private college hrang hranga zirlai pawlte chuan education minister hnenah lehkha thawnin, hri lengin ziaawm lam a pan hma chuan zirna inte chu  hawng rih lo turin an ngen a ni.  

Sikkim-ah Covid-19 kai pakhat a awm mek thu sawiin, punkhawmna lam chi khap a la nih loh chuan hri kai zat hi an pung chho hluai thei a ni tiin, school leh college-te bakah punkhawmna hmun dangte pawh la khar rih an duh thu an sawi.