Prime Minister Narendra Modi-an ni hnih chamin kar kalta khan Assam a tlawh a, a cham chhung hian hmun hrang hrang a tlawh kual a, vantlang inkhawmah thu a sawi bawk. 
Hailakandi aṭanga km 25-a hla Kalinagar-ah Prime Minister chuan thu sawiin, Barak valley leh a chhehvela industry lian awmchhun Cachar Paper Mill of Hin-dustan Paper Corporation, Panchgram, Hailakandi district a mi chu chawinun ṭhat leh a, din thar leh a nih tur thu a sawi. 
Modi chuan Paper mill chu Congress sorkar chuan a hluihlawn niin a sawi a, hei hian helai chhehvela mipuite hamṭhatna leh hmasawnna tur tam tak a hloh tir phah a ni, a ti. Barak valley-ah hian hmasawnna chak zawka kalpui a nih theih nan inkalpawhna kawngpui tam zawk siam a ṭul thu a sawi bawk.
Modi chuan venhimna lam pawh khauh zawka kalpui a ṭul thu a sawi a, Hindu pemkhawm an nih avangin venhimna ṭha tak pek an ngai a, hei hi Parliamemnt-ah pawh sawi chhuah a nih tur thu a sawichhuak a ni. Silchar-Saurastra Mahasadak, East West Corridor chu kum reilo te chhunga hawn theiha peihfel hman tum a ni a, hawn a nih hunah chuan hmasawnna tam tak hmuh theihin a awm thuai dawn niin Modi chuan a sawi a, hnathawh tikhawtlai-ah Congress chu a puh bawk a ni.
Prime Minister hian Assam-a a cham chhung hian vantlang inkhawmah vawi enge maw zat thu a sawi a, BJP thlipui chuan India ram a tuam mek thu leh an hmelma lian Congress Party tan sorkarna siam a harsat tur thu a sawi. Assam-ah ngei pawh Congress chuan hun rei tak chhung sorkarna chang tawh mah se an paihthlak theih a inrin thu Modi chuan a sawi bawk. 
Assam Chief Minister Tarun Gogoi-a kaihhruai sorkarna hnuaiah state mipuite chuan retheihna an hmachhawn mek niin Modi chuan sawi a, state chu a hnungtawlh mek a ni, a ti. Ṭhalai tam tak hnathawh tur nei lo chu state pachhia hmel lanna niin a sawi a, Assam-ah hian lui lianpui pui pali a luang-a amaherawh chu mipui ten tuithiang hlim intur an nei chuang lo a ni. Tunge a mawhphurtu chu zawng chhuak rawh u, tiin sorkarna chang mek Congress party chu hna takin a bei a ni. 
BJP chief ministerial candidate Sarbananda Sonowal leh an party candidate te chu vote vek turin PM chuan mipuite chu a sawm bawk.