Indira Gandhi lim din tum
Tripura-a CPI(M) kaih-hruai Left Front sorkar chuan Prime Minister hlui Indira Gandhi lim chu Chottakhola Muktijuddha Park-ah din tumin hma an la mek.
State sorkar hian Bang-ladesh liberation war hun laia mi ropui leh father of the nation ni bawk Sheikh Mujibur Rehaman lim pawh siam nghal a tum bawk.
Chief Minister Manik Sarkar hoin Inrinni khan Chottakhola Park tih changtlun dan tur ngaituahin an ṭhukhawm a, lim siam chu hun kal tawh, tun hun leh hun lo la kal tur thlun zawmtu a nih avangin a pawimawh hle tih Sarkar chuan a sawi.
Chottakhola Mukti-juddha Park hi Bangladesh ramri bul, South Tripura district-a Belonia hmunah din niin a dinna la rei lo hle mah se sorkar chuan a ngaipawimawh hle tih Sarkar chuan a sawi. Indira Gandhi leh Mujib lim siam hna hi Agartala Government Art’s College chuan a thawk dawn a ni. Park-ah hian milim dang eng emaw zat dah tum a ni bawk. He hmun hi state sorkar chuan khualzinte hipna hmun paiwmawh takah chantir a tum a, park chhunga hian cafeteria leh tourist lodge-te pawh dah a ni ang.