Shillong Cherry blossom festival hlawhtling takin hmang zo

Shillong cherry blossom festival chu Pathianni khan a zo ta. Meghalaya tourism minister Paul Lyngdoh chuan festival tawp ni hi hmanpuiin, harsatna eng eng emaw tawk mah se, festival hlawhtling tak an nei thei a, mipui an ngaihlu hle niin a sawi.

Cherry blossom festival tawp ni hi Bhoirymbong, Ri-Bhoi district-a RBDSA sports ccomplex-ah hman niin zaithiam hrang hrang an zai a, khawvel huapa zaithiam lar, Ne-Yo bakah Boyzone vocalist Ronan Keating te pawh an zai. Festival tawp ni hi zai lama inawih nan hman a ni deuh ber. Khawtual mi eng emaw zat inlanin an zingah hian Jonas Blue, Sanam Lou Majaw, Blue Temptation, Da Minot, Nokpante, Rhem, Favian, Wanjop Sokhlet, Banrap, Youngg Nate, DJ Me Ban, Lamphrang leh Toshan te an tel.

Tourism minister Paul Lyngdoh chuan," Tun ṭuma Shillong cherry blossom festival kan hman hi zaithiam kan sawm te enin leh, khualzin lo chhimtu awm zat aṭang tehin a hlawhtlin ber ṭum a ni kan ti thei ang, Festival hmanga lo kal 70% te hi kan zaithiam zai sawmte en duha Meghalaya rawn tlawhtute an ni. Rimawi kan tlachham lo a, Khasi rimawi bakah Bolllywood te, leh rimawi chi dang dang kan ngaithla thei hi a hlu hle a ni. Tun ang festival-a rimawi, thil siam mawina leh hnam ziarang inkawp taka a kal hmuh hian rilru a tihlim em em a ni," a ti. Lyngdoh hian festival sponsor-tute, zaithiam an sawm te, leh Shillong mipuite chu lawmthu hrilhin, Shillong cherry blossom festival 2023 hlawhtlinna chu anmahni vang liau liau a nih thu a sawi. Kumin Shillong cherry blossom festival hi Japan ambassador-in a hmanpui bawk a ni.