Assam: Thingpui huana thawkte'n kawng dang

Assam-a Jalan tea estate-a thawk mi 100 chuangte chuan kawngpuia accident rapthlak tak avanga an thawpui pakhatin nunna a chan chungchangah nawrh huaihawtin, nimin khan Dibrugarh district-a Thana Chariali-ah kawngpui an dang.

Pathianni khan Dibrugarh-a Chowki-dinghee kawngah motor pakhatin helai thingpui huana thawkte a su a, an zinga parukin hliam na tak an tuar a, hmeichhe pakhat, Labanya Tanti chuan nunna a chan bawk a ni. Thuneitute chuan motor khalhtu hi an man tawh thu an sawi a, thingpui huana thawkte kawng kan lai hi a motor khalh, Hyundai i-10 hmangin a su niin an sawi. Mitthi chhungte hian FIR an theh lut tawh bawk a ni.

Thingpui huana thawk zinga pakhat chuan motor chu a tlan chak hle a, kawng sira Maruti Omni motor ding lai chu a su bawk niin a sawi a, hemi hnu hian mihring kawng kal chu a su chhunzawm leh a ni, a ti. Assam Teas Estate Workers Union (ATTSA) chuan pawikhawihtu hi man thuai an phut thu tarlangin, thuneitute chu helai hmuna motor tlan chak zawng chungchangah ruahmanna siam se an duh thu an tarlang. "Accident hi fimkhur loh leh chak lutuka motor khalh vanga thleng a ni. Mihring tamna laia chak lutuk a a tlan thei hi thuneitute hmalakna tur niin kan hria. Ruahmanna mumal tak an siam a ngai a ni," an ti. Police-te chuan motor khalhtu nia sawi, Sashi Agarwal chu an man tawh tih an sawi.